Ramchung kahdohnak ah Palek le ralhrang a thi mi a let hnih leng in an tam,zarhkhat chungah minung 224 an thi tiah NUG nih a than, A luancia thawngthanhnak ah ralhrang a thi mi nak in atu thawngthanh mi ah a thi mi 224 an si i a thi mi a lethnih in an tam deuh. NUG nih DDay a thanh hnu kahdohnak a zarh tein thawngthanhnak in a luancia zarh le atu zarh kan tahchunh tik ah a let hnih in a thi mi an tam tiah kan hmuh.
September 14 in 20 chung ah ralhrang a thi mi 109 an si i 34 an i hliam.September 21 in 27 tiang ahcun ralhrang a thi mi 224 an si i a hliam mi 38 an si. D- Day thanh thok in mipi lei ah i fonh ding in a kan pehtlai mi zong ni khat hnu nikhat an tam chin tiah NUG nih theihternak cathanh an chuah.
Kachin ramkulh, Putao khua ah honmi (GTI-Putao) sianginn ah ca cawngmi final year siangngakchia hna cu thlahnih lawng kai ter an si hnuah, engineer degree an pek hna tiah (GTI-Putao) he pehtlai mi pakhat nih a chim. Rikhiah mi fim thiamnak tlin hlan ah degree pek an si nak kong ah (GTI-Putao) he a pehtlai mi pakhat nih ” tuahkel sianginn kai cu December thla in kai hramthok a si, February thla ah ralhrang nih nawlngaihnak an lak caah sianginn khar a si. June thla hrawng in Non CDM Saya/Sayamah fonh nih sianginn an hon than.
Sianginn zong tha ten kai lo in July thla ah exam an tuah ter hna. Practical zong tuahter lo in degree an pek hna” tiah a chim. (GTI-Putao) ah ralhrang phu nih nawlngeihnak an lak hlan ah kumthumnak kai mi siangngakchia dihlak 100 leng an si nain,ralhrang phu nih nawlngeihnak an lak hnu sianginn an hon than ah tlawmte lawng nih sianginn an kai tiah theih a si. GTI-Putao ah ralhrang uk duhlo in CDM cawlcanghnak ah a tel mi saya/ sayamah le zung riantuan dihlak minung 26 hrawng an si. DVB
Leave a Reply