Ralhrang nih phungbuar zau in Nu ralkap pawl cu raltu ding in nawl a pek hna tiah CDM tuahmi ralkap nih dirhmi ”mipi ralkap” (People’s Soldiers) nih a phuan. Ralhrang phu nihcun ”PDF nih an kan kah tik ah Battalion kip in ready te’n um ding in an ralhrang pawl cu nawl an pek hna i Nu ralhrang zong hriamnam tlaih in raldoh ding ah nawl chuah asi” tiah People’s Soldiers nihcun a langhter.
Cun Nu ralhrang pawl raltuk ding in hman a timhmi hi raltuk phung buar a si caah nu ralhrang nih an al hrimhrim awk a si ti zong an langhter chih. Cu lawng siloin ram pumpi huap in inn hlangmi cazin lak hna i a ran khawh chung in cunglei ah kuat ding timi nawl zong an chuah. Hi kong hi anmah ralhrang chung thirhri(ceenaan) chung in nawl an chuahmi asi tiah CDM tuahtu ralkap nih dirhmi ”Mipi ralkap ”( People’s Soldiers) nihcun a langhter.
Yangon ramthen Kamaryaut peng no.7 sang ah September 15, zaan suimilam 10:00 hrawng in tim tiang ralhrang phu hna nih luhhnawh in checkhlatnak an tuah hna hnu ah minung 6 nak tlawmlo tlaih an tong tiah cu ka hmun pawng um mi hna nih an chim. Ralhrang motor 7, inn hman mi motor 2 le ralhrang minung 40 hrawng nih luhhnawh in an tlaih hna hi a si, an umnak inn dal in tlaih a tong mi mino cheukhat cu,
An tuk velh hna nak hmanthlak cu Facebook cung ah an tarlangh. An um inn dal cheukhat an luhhnawh hna ah meithal puah thawng he nu au thawng zong kan theih caah an tlaih mi hna ah nu an i tel tiah pawngkam hmu tu hna nih BBC ah an chim. Ralhrang phu hna nih luhhnawh in an tlaih hna lio cu, inn cung in hman thlatu minung pakhat zong an tlaihchih,
Nizaan zaankhat ah tlaih a tong mi minung 6 nak tlawmlo an si tiah Kamaryaut peng chung um mi hna nih an chim. A luancia September 7 ni ah NUG nih ramchung D-Day thawngthanhnak a tuah hnu ah , zaan ah checkhlatnak, tlaihkhihnam puahkehnak tamdeuh a chuak, ralhrang phu chungin kahnak ruang ah a thi mi zong an tam chim.
Leave a Reply