August 30 ni ah Naypyidaw PDF le rallokap kahdohnak voihnih a um i rallokap lei in minung 11 an thi tiah Naypyidaw PDF nih September 2 ah an thanh. Naypyidaw PDF Battalion(801) no. (4) le hriamtlai phu dang hna i bawm in Pinmana peng Sikphu tlang le Letphat tlang kar ah rallokap mawtaw hna in an ra i zaanlei 4:00 hrawng ah i kahnak a chuak. Cu hlei ah zaan 7:00 hrawng thazaang tampi he,.
Arak kai mi rallokap mawtaw hna cu an kah hna ruangah rallokap lei in minung 11 hrawng an thi i Naypyidaw PDF lei a hliam mi um lo im hnu kan kir kho tiah an langhter. Naypyidaw PDF nih atu bantukin rallokap bu hna hi kandoh peng cang lai caah mipi ah dir duh mi hna rallokap CDM luh a duh mi hna cu lunglawm tein kan in cohlan hna i tangka le himnak lei zong ah kan im bawmh hna lai tiah an langhter. The Chin Post
August 28 thawkin September 1 tiang Shan ram Mungkoe pengah Kokanh hriamtlaibu MNDAA le ralhrangbu kar ah fak ngaiin kahdohnak a chuah ruangah mipi 1000 leng an zaam tiah theih a si. August 28 ah MNDAA le ralhrangbu hna Nanha khuapawng i kahnak ah khuachungah hriamngan kuan a tlak caah khuami 4 an nunnak a liam, inn cheukhat a rawk.
August 29 Konglung khuakomu chungah fak ngai in an i kap than i, khuachungah hriamngan in kah a si caah inn zei mawzat a rawh pinah khuami hna cu Mungkoe khuachung phungki inn le KBC biakinn ah an zaam, an i dor chung rih ko tiah Nanha khuami pakhat nih a chim. Ralzaam hna hi atu tiang ahcun eidin ah harsatnak cu a um rih nain,atu bantukin an i kah rih a si ahcun eidin ah harsatnak an tong lai ti an phan ngai.
Thilri thlennak zong zeihmanh an ngei ti lo tiah ralzaam hna sin in theih a si. August 30 ah Muse pengkomh Pangsai le Namhu kar ah ralhrangbu le MNDAA hna fak ngai in an i kap than i, ralhrangbu lei bawi hna tel in tam ngai an thih lengah hriamnam zong tampi an lak tiah theih a si. Ref; MMNE
Nizan September 1 ah Mon ramkulh Pawng peng Te-ein khua ah meh kawlnak in a rak tlung mi nupa hna cu ralhrangbu nih an kah hna ruangah nau a pawi lio mi a nupi cu a nunnak a liam pin ah a va pa zong hliam a tuar tiah khuami sinin theih a si. A nunnak a liam mi nu hi kum 27 mi, Ih Thwe Moe hi thla 5 mi nau a pawi lio mi a si i, a va pa hi U Dei@Min Nay Lwin (kum 29) a si i, a mit le a ke ah hliam a tuar i, Pawng sii inn chiah a si.
Hi nuva hna hi an meh kawlnak in September 1 zaan suimilam 10 hrawngah an rak tlung i an inn pawng an phak ah ralhrangbu hna cu datmei in an ceuh sual hna ruangah an kah mi hna a si tiah khuami pakhat nih a chim. Hi kong he pehtlaihin khuami pakhat nih; Kataik khuakonh chungah ralhrangbu nih zaan petroling an vah lio ah an kah mi a si. Meithal zun 10 hrawng in an kah hnuah an kaltak ko. Zeihmanh ah an rel lo. Fanu kum 4 pakhat an ngei tiah a chim. Ref; Myanmar Now
Leave a Reply