BreakingNews Thantlang khua chung ah Council ralhraang nih Pu Ral Tu an kah i a nunnak a liam 2021 September 29 Pu Ral Tu (Bawi Bik Thawng pa) cu tu zaanlei suimilaam 6:30 ah Hakha in Thantlang an tlun pah, Pu Aung Bu inn hmai ah Thantlang um ralkap nih an kah i motor cung ah a thi colh, tiah theih a si. Pu Zo Peng zong a lu ah an khen ve i a nih hi cu a thi lo. Pu Lawm Bik, Pu Than Heng le an motor mawng cu an him, tiah Thantlang Sipin Committee Chairman Pu Ram Khar sin in theih a si. (Thawngpang tling deuh in tial khawh kan rak i zuam than lai
Sagaing ramtthen chungah a thlithup tein phungki tlaih tongmi le thah tongmi an karh thluahmah tiah Sagaing ramtthen chung an mah Kawl biaknak Buddhist biaknak lei ah rianttuan tu mino hna sin in thawngpaang theih a si. September thla chungah a tlaumi le pehtlaihnak tuah khawh si lomi phung 12 hrawng an um cang i ralhraang nih uknak an laak hnu ah a tlaumi le thah tongmi dang hna he fonh ah cun 30 hrawng an si cang. Hi kong he pehtlai in Kawl biaknak lei ah a cawlcaangmi mino pakhat nih “tu September thla chungah hin district pa 4 chungah phungki cheukhat an tlau, peng in tuak ah cun peng 9 an si, a tam deuh cu khuate lei in an chiah hnami phungki pawl an si” tiah a chim.
Yinmabin district, Kani peng chungah an dam lo ruang i Monywa khua ah an va thlopnak in a rak tlungmi phungki pakhat telh in minung pa 5 an tlau, “Monywa ah an va thlop hnu i an rak kir lei ah phungki pakhat telh in minung pa 5 hna cu Chaug Ma le Kani kar motor lam cungah an tlau, a tlaumi hna hi Phungki pa U Ke Lar, cun khuami U Khin Maung Tint, U Khin Maung Lwin, Ko Chit Wai le motor mawngtu Jit Toe hna an si. Kani peng chung ah tu bantuk in phungki le an mah he kal ttimi minung pawl tlaunak hi voi 5 a chuak cang, a luan ciami May thla ah khan phungki pakhat cu a ho ti theih lomi nih an rak tlaih hnu ah Chindwin tiva khat lei ah hliamhma khat lak he a thiruak in a rak char.
July thla chung zongah khan Minkin in Chindwin tiva zawh in Monywa lei ah kalmi sehlawng cung cuang phungki pakhat le a zul tu minung pa 3 hna zong an rak tlau i tuni caan tiang hmuh khawh an si ti lo. Kan hnu lei te zongah khan Minkin peng, Laung Pyae khua ah phungki pakhat cu phungki sianginn chung bak ah thilak an rak kah. September thla ni 21, zing suimilam 3:00AM hrawng ah Kawlin district, Vuangtu peng, Alekhung timi khua ah phungki pakhat zong phungki sianginn chung um lio ah naam in thilak an sawh, Sagaing ramtthen chungah tu bantuk in phungki pawl an tlau lengmang mi le thah an tonmi hi zei ruangah si, mi zei nih dah an tlaih i an thah hna timi zong an thei kho lo.
Leave a Reply