Ralkap Nih Laimi Inn An kangh Than

Thantlang khuami inn a kaang cuahmah, tiah kan theih. “Inn a kaang mi hi Market pawng, CB Bank pawng in Pu Chan Ham inn tiang hrawng a kaang cang an kan ti. Pu Chan Ham inn le market tiang hrawng ah inn 10 hrawng a um. Meithal thawng zong pehtlai in kan theih cuahmah,” tiah khuami pakhat nih The Hakha Times ah a chim. Aluancia September 18 zaan zong ah Min Aung Hlaing naule nih Thantlang sianginn sang ah inn thatha 18 le Hotel pakhat an rak khangh bal cang.

A voi 38nak le 39nak kemh in tuah mi ASEAN Summit cu zahan ah a dih cang. Kawlram kong deuh nih a khuhcilh kan ti nain Kawlram kong ah phun dang tuk in biachahnak thar tu cu a um lo. Cahmai 27 aa telmi ASEAN Chair statement an hun chuah i, a tanglei bik ah Kawlram kong a dang tein aa tel.

Statement ah a biapi bik in an hun langhtermi cu April 24, 2021 ASEAN (Emergency) Summit lio i rak sermi Five-point Consensus kha tuanchuah a si nakding ah Kawl ralkap pressure hun pek khi a si; ASEAN Envoy Kawlram luhter ding, le ton a herh mi paoh tonter ding. Irrawaddy nih a tial ning ahcun ‘Thongtla vialte chuah ding in an hal’ a ti. Nain statement ah cutin an tial lo. “We also heard calls for the release of political detainees including foreigners” ti khi a si.

“Chuah hna u” ti siloin “chuah ding in halnak pawl kan rak theih” ti tu khi a si. Mah zawn hi Emergency Summit lio ah khan Min Aung Hlaing nih a cohlan khawh lo caah hnatlaknak (Consensus) chung ah an telh khawh lomi a si. Mah ruang ah atutan zong ah “chuah hna uh” tiah dengteo in an hun telh ngam lonak a si lai. ASEAN phukomh in Kawlram chuahter an i timh lonak kong zong an langhter.

Nain October 15 ah tuah mi ASEAN Foreign Minister meeting i biachahnak tu cu “kan fehter chap” an ti; Min Aung Hlaing sawm lonak kong kha a si. Hi ASEAN Consensus kong i a hun buai biknak cu ASEAN palai le Aung San Suu Kyi telh thongtla pawl, le Kawl ralkap a dohtu phu pawl ton an sian lomi [Kawl ralkap nih] ruang ah a si. ASEAN hnatlaknak thathi in a tuanchuah lo chung paoh cu ASEAN he pehtlaihnak a tha kho lai lo tinak a si.

Atutan ASEAN Chair statement a donghnak catlang ah an tialmi cu phun dang te a si. “we remain committed to support Myanmar in its efforts to return to normalcy in accordance with the will of the people of Myanmar” an ti. Fimzer ngai in catlang tian zong a lo pah. Punghman dirhmun (normalcy) kir than ding timi khi cheukhat nih cun ‘2008 Constitution tang ah kir than ding tha an pek’ tiah i kuaih khawh a si.

Nain biatlang a donghnak lei ah “mizapi duh ning in” an hun ti chap. Mizapi nih cun 2008 Constitution cu kan duh lo, ti cu an hngalh ko lai…. – ASEAN Chair a tlai chom dingmi Combodia in an Foreign Minister Prak Sokhonn nih Kawlram kong ah “nawr chap” an i timh mi a chim. “Kawlram cu hmai kan nawrter rih ko lai” a ti. Pressure pekchap an i tim, ti zong in media nih cun an tial.

Cambodia nih Chair a tlaih tik ah Kawlram kong buaipitu palai thar an i thim lai; Atu i Brunei nih a thlah mi Erywan Yusof khi a thlen lai tinak. Cambodia nih zeitin dah an kalpi lai, timi nih khin hmailei ASEAN le Kawlram pehtlaihnak kong cu lai a rel ngai te lai. Biadonghnak Atutan ASEAN Summit ah ram kip nih bia-neng nawn cun an hun tongh pah dih. Nain an ralrin mi zong hmuh khawh a si.

Ramchung kong ah i thlak lo ding “non-interference principle” kha an lungkil ah an chiah cionak a lang. “2008 Constituion nan buar, thongtla chuah uh” tibantuk khi direct in an ti hna lo. Hun ti hna selaw non-interference principle he ai kalh ding phun in a um ve. – Min Aung Hlaing, nangmah zong nih na pommi a si ko; ASEAN Five-point Consensus hi cu na tuanchuah hrim a hau, ti deuh in pressure hun pek khi an zate an i ruahnak cu asi

Be the first to comment

Leave a Reply

Your email address will not be published.


*