Civil cozah le ralkap karlak buaibainak linhsat lei a panh chinchin lio pi ah a tu bantukin thinphan thlalauhnak thawngpang a vun chuak taktak ko cang.
November Election lio ah khan cozah dirh (form) kho dingin NLD nih teinak a hmuh. Asinain, vote firnak an tuah le si, tiin ralkap lei nih an chim.
Myanmar hi 2011 hlan chung paoh kha ralkap nih an uk. Suu Kyi hi kum tampi a inn ah erh a si bal cang. Thim tharmi Lower House (Ohhluatdaw) nih nihin Monday ah hin tonnak hmasabik ngeih an i tim nain, ralkap lei nih a ni an thawnter hna.
Naypytaw le Yangon lam kip ah ralkap an um lulh, tiah BBC South East Asia thawnglatu Jonathan Head nih a chim.
Pi Suu Kyi, President Win Myint le a dang hruaitu pawl cu tuzing zingka te ah ralkap nih an tlaih hna, tiin NLD aiawhbiachimtu Myo Nyunt nih Reuters news agency sinah phone in a chim.
“Mipi nih faaktuk in lehrulhnak an tuah lai hi ka duhpiak hna lo. Phungningtein cawlcang hna seh, ti ka duh” tiin a chim.
Khuapi tamdeuh ah cun internet data connections le phone line pawl zong hnursuan an tong manh cang. Kan seh ai rawk caah thawng kan thanh lo bia a si, tiin MRTV nih cun a chim. Khua tami ah a ummi chief ministers pawl cu an inn ah ralkap nih an va fuh hna i an tlaih hna, tiah an chungkhar pawl nih an chim.
Saturday tiangah khan cung phunghrampi kan zul ko lai, tiin an chim nain, a thlitein nawlngeihnak chuh (aana ting) an rak i tim ziar.
𝐄𝐥𝐞𝐜𝐢𝐭𝐨𝐧 𝐚𝐡 𝐳𝐞𝐢𝐝𝐚𝐡 𝐚 𝐜𝐚𝐧𝐠?
November 8 election ah khan NLD nih 83% tluk in teinak a hmuh i, Hlawttaw ah thutdan zaa lakin ai tonenh kho dirhmun a si. Suu Kyi cozah nih phung remhsiamnak (referendum) a tuah khawh cang lai, tiin mi tampi nih an hmuh.
2011 i ralkap uknak a dongh hnu ah tutan hi avoihnihnak election lawng a si rih. Asinain, election results kongah ralkap an lung a tling lo i, Supreme Court ah President le Election Commission chiar taza an cuai hna.
Vote a tomtom in fir a um, tiin ralkap lei nih an chim hnu tein khan aana tingnak (coup) a um kho, tiin mipi cu an thinlawng an i domh cang. Tazacuainak an tuahmi cu Election Commission nih an hnonpiak hna. Credit : Chelsea Bawi
Leave a Reply