Ralkap Cu Nifatin In Thah An si Cang Tu Zing Kahdohnak Ah

Kalay PDF nih bomb puah in an doh hna caah ralhrang phu lei in minung pahnih an thi,minung pathum nak tlawmlo nih hliam an tuar, Kalaymyo in Tamu lei ah kal mi ralhrang motor fa mi pathum cu an kalnak meng 56 khua le Kanhlah khua kar Myalaytawng pawng ah Kalay PDF nih bomb puahhnawh in an doh hna caah ralhrang phu lei in minung pahnih an thi, minung pathum nak tlawm lo nih hliam an tuar tiah theih a si.

Nizaan September 30 zinglei suimilam 11:30 hrawng ah an doh hna hi a si tiah Kalay PDF nih nizaan zaanlei ah cathanh an chuah.Cu cathanh chung ahcun Kalaymyo in Tamu lei ah a kalmi ralhrang phu hna motor cu bomb puah in doh an si caah, ralhrang phu motor cu puahhnawh in hliamh a si caah lamkam khor ah a tla tiah an langhter.

Sagaing ramtthen, Pale peng, Letpuhkan khua pawngah raldo ding in kalmi Min Aung Hlaing ralhraang pawl an cuannak motor cu mipi vengtu ralkap nih mine bomb in an tthuat hna hi ralhraang pa 10 nak tlawm lo a thimi le hliamhma pumi an um tiah People’s Defense Force hna sin in thawngpaang theih a si.

Tuni September ni 30, kum 2021 zing suimilam 11:00AM hrawng ah khan Pale khua in a rak chuakmi Min Aung Hlaing ralhraang pawl cu PDF ralkap hna nih lampi in an rak bawh hna i mine bomb in an tthuat hna. An cuannak motor mine bomb puah ton hnu ah Min Aung Hlaing ralhraang lei nih bomb kahnak in an kah chih ve hna caah PDF lei nih hnu lei ah an sip taak tthan hna.

Hi kong he pehtlai in PDF ralkap lei an hruaitu pakhat simi Bu Nagar timi nih “mine bomb pa 6 in kan phomh hna, a tom tom bak in an thi ko, a thimi hi a tlawm bik pa 10 cu an si hrim hrim lai, cun hliamhma faak pumi zong an um, ruahpadamh in bomb an kah chih ve ruangah dai tein hnu lei ah kan sip taak hna” tiah a chim.

Sagaing ramtthen chung cheukhat ah hin Min Aung Hlaing ralhraang pawl nih Internet Signal tiang phiat in PDF an doh hna, PDF an tei khawh hna lo ruangah zei sualnak nei lo khuami an tlaih, an thah hna hlei ah khua chung tampi zong an khangh piak hna, meithal thawng theih ruangah thinphang in a zaammi mino pa 2 hna cu meithal in an kah hna i mino pakhat zong inn chung ah hreng in mei in an khangh chih.

Be the first to comment

Leave a Reply

Your email address will not be published.


*