Ralhrangbu nih nawlngeihnak an lak ruangah Lothlo pawl Harsatnak tampi an tong

Ralhrangbu nih nawlngeihnak an lak ruangah Lothlo pawl Harsatnak tampi an tong

Kawlram mi tam deuh cu lothlawh in paw a cawm mi kan si bantukin tukum zong fur a tla cang lai caah Lothlo pawl cu an lei/lo facang le thlaicin dingin biatak tein an i timtuah nain rampi buainak ruangah harsatnak tampi an tong.

Mi cheukhat cu an lei ah duhning in thlai an cin khawh lo caah Cozah nih tangka a coih chung tawn hna. Tukum ah Cozah leiin a kan ruahpiak mi a um lo pinah bank zong tha tein a kal lo caah an thinphang ngai cio. Cheukhat cu an rak cawi cang mi zong kan cham ti lailo tiah an ti.

Ayeyarwady, Sarhyusu khua Ekah 8 lei a ngei tu U Aung Myint nih “Kum fatin fur a tlak lai paoh ah zeitindah riantuan man ka pek khawh lai ti ruat in ka lung rethei peng. Tukum chinchin cu kum dang nakin a zual deuh lai ka zumh” tiah a chim.

Nikum COVID-19 ruangah eidin ah harsatnak a tong cang mi Mi sifak tampi caah lungrethei a si.

World Bank nihcun “Ralhrangbu nih uknak an lak ruangah Sifahnak a zual lai, Eidin harsatnak a zual ter lai caah Mi sifak pawl caah sifah chinchinnak a chuahter te lai. Cucaah, tukum Lothlo pawl riantuannak theipar nih tampi lai a rel te lai” tiah a ti.

Kum dang ahcun Lothlo pawl riantuannak caah an herhbau mi cu a cozah nih coih chung tawn a si nain tukum ahcun a man pek colh lengmang a hau pinah a man a kai dih tikah an cawi kho hna lo.

Thil man a kai, kan thlai a hramchial lo ahcun kan zuar kho lai lo. Kan ram a buai ruangah thil zuar le phorh zong a har ngai tiah theih a si.