Ralhrangbu Nih MNDAA Tuk Dingin Militia Pawl A Thlah

Ralhrangbu Nih MNDAA Tuk Dingin Militia Pawl A Thlah Kokanh hriamtlaibu Myanmar National Democratic Alliance Army (MNDAA) tuk dingin ralhrangbu nih Kokanh area ah a ummi pituhsit 40 hrawng a rak thlah tiah MNDAA nih an thanh.

Hi kong he pehtlaihin ‘Kokanh miphun dohthlennak ah Kokanh miphun kar ah kahdohnak a um ding hi kan hmu duh lo.

Ralhrangbu he kahdohnak ah thisen khat Kokanh miphun an i tel mi zong kan duhlo chinchin’ tiah MNDAA ralbawi pakhat nih a chim.

Kokanh chaklei Lungkhan khua ah ralhrangbu le pituhsit hna fonh cawlcanghnak an tuah pin ah Mungko lei zong MNDAA le ralhrangbu kar ah kahdohnak a um i, ralhrangbu nih pituhsit cu thazaang a chap ter hna.

August 17 ah ralhrangbu nih minung 100 hrawng a chap mi le Tatyin 79, 315, 575 hna fonh in Mongko ah hrambunh mi ManHpa MNDAA Brigade 511 sakhan an tuk ruangah fak ngain an i kap tiah a si.

Haikpan lei zong MNDAA brigade 511 sakhan pakhat cu ralhrangbu nih a kah ruangah kahdohnak a fak ngai tiah theih a si.

A tu ah Kokanh chaklei ah a um mi ralhrangbu hna nih Thanlwe tiva nitlak leiah thazaang an chap hna i cuka hrawngah a um mi MNDAA cu tuk dingah a tim tiah MNDAA nih an thanh.

The Chin Post