Ralhrangbu Nih Karen Ram An Riahbuk Pakhat An Chuahtak

Ralhrangbu Nih Karen Ram An Riahbuk Pakhat An Chuahtak Karen ramkulh Kyainseikkyi peng Kyeik khua ah a ummi ralhrangbu riahbuk pakhat cu August 20 zinglei ah an chuahtak.

Ralhrangbu nih an chuahtak hnuah KNU/KNLA ralkap an ra i, an riahbuk cu vawlei cawhnak seh in an hrawh i, inn zong mei in an khangh dih tiah theih a si.

Hi ralhrangbu riahbuk hi 1997 kum ah Saw Tu Mu He hruaimi KPF hna ralhrangbu kut ah an i pek hnuah ralhrang nih riahbuk ah an rak hman mi a si.Hi riahbuk ahhin ralhrangbu 30 hrawng an um tiah theih a si.

Hi kong he pehtlaih in khuami pakhat nih, zinglei suimilam 7 hrawngah Kyaitung lei ah an thilri le hriamnam vialte phor in mawtaw in an i thawh cang.Kahdohnak zong zeihmanh a um lo tiah a chim.

KNU/KNLA liberated area cheukhat ah ralhrangbu nih an riahbuk an chuah tak mi hi atu nai hrawngah a um pah len tiah Karen Information Center nih a tial.

The Chin Post