Ralhrangbu Nih An Tlaih Mi Siangngakchia Ko Htet Ko Oo A Nunnak A Liam

Ralhrangbu Nih An Tlaih Mi Siangngakchia Ko Htet Ko Oo A Nunnak A Liam Ralhrangbu nih bomb puahnak kong he pehtlai im July 20 ni Dagon seikka ah an tlaih mi Ko Htet Ko Oo (kum 23) cu ralhrangbu biahalnak hmun ah a nunnak a liam tiah a chungkhar pakhat nih a chim.

Kan si khawh chungin kan hlat hunah ka u cu a thi cang tiah kan thei.Zeitik ah dah a thih ti zong kan thei lo, August 2 ah kan thei mi a si caah mah ni cu a thih ni ah pom in ka u caah thatnak tuah kan timh cang.

A thei mi nan um a si ahcun kan hlat piak te ulaw kan duh ngai.A ruak zong a um ti lo tiah kanmah nihcun kan thei.Khuazei hmanh in thawng a kan thanh rih lo.Kanmah nihcun a dam rih ko lai ti zumhnak kan ngei rih ko tiah a ti.

Ko Htet Oo hi July 20 ah Dagon seikka myone, 85 veng ah a ummi thilthitnak hmun chiahnak hmun pakhat ah kutser mi bomb le a sernak thilri he kan tlaih tiin ralhrangbu thawngthanhnak nih a thanh.

Amah he an tlaih ti mi minung 29 hna zong an chungle nih khua zei ah dah an chiah hna ti an theih ko pinah pehtlaih khawh zong an si lo ruangah an chungle an lungrethei ngai tiah theih a si.

An tlaihnak pawngkam palek sakhan hna zong nih thongthlak khawhnak ca an lak ti lo ah zeihmanh fiangfai in an theih mi a um lo.
Dagon seikka ah an tlaih mi cazin chung zongah a min kan hmuh lo.Shwepinta lei kan hal tikah a thi tiin an kan chim lo.

Mah bantuk kongah kan theih lo mi a tam ngai tiah Dagon seikka palek pakhat nih a chim tiah MPA nih a tial.

The Chin Post