Ralhrangbu Bolawng Min Cazin Pek Caan Thlakhat An Thawn

Ralhrangbu Bolawng Min Cazin Pek Caan Thlakhat An Thawn Kan theih cia bantukin ralhrangbu nih uknak a lak hnuah a hohmanh ralkap ah luh i, ralhrang rian tuan a duh mi an tlawm tuk cang caah kan hnu lei ah ralkap a tuan kho ding mi cu fimcawnnak lei ah tang 6 aung mi in tang 4 aung mi ah an rak thumh cang.

Atu ah ralhrangbu academy a kai ding mi, Defence service academy (DSA), Defence Service Technology Academy (DSTA) le Defence Service Medical Academy (DSMA) an auh mi cu min a pe mi an tlawm caah August 4 in August 31 tiang an thawn than.

Ralhrangbu nih Covid-19 ruangah kan thawn mi a si.Mah le a naihnak regional command hmunpi (တိုင္းစစ္ဌာနခ်ဳပ္) cio ah min pek khawh a si.Form a la cang mi hna zong nih caan a dih hlanah min pek dingin an thanh.

Ralhrangbu nih uknak a lak hnuah mipi cungah zaangfahnak tello in a cawlcanghnak ruangah mipi le ralhrangbu kar ah pehtlaihnak a hlat chinchin, Mino tampi mipi ralkap (PDF) ah an luh caah ralhrangbu nih mithar kawl an i harh ngai cang tiah theih a si.

The Chin Post