Ralhrang kuttang um palik phu hna cu December thla thok in palik sakhan kip i palik nupi hna cu raltuk cawnnak tuah ding in nawlpek an si nain palik nupi hna nih, cu nawlpek mi cu an el tiah theih a si. Raltuk training pekding nu palik 100 luan cu khomhsuat in training pek an thok ah palik nupi hna nih an el caah raltuk cawnnak cu an ngol than tiah training peknak lei in tuanvo ngei pakhat nih a chim.
” Raltuk cawnnak thokni in ngan damlo ruang, bussiness ruang le chungkhar kong ah tiin phun dangcio he cawnnak an ngeihkhawhlo nak kong chim cio in, inn tlun cio an ti caah a tu cu training an ngol” tiah theih a si. Palik nupi hna cu training pek an si dih in security hngahter ding ah Myanmar ram palik phu nih direct in nawlpek an si i, cu training kai ding mi ah cun duh- palik bawi nupi telh in palik nupi hna an i tel tiah theih a si.DVB, The Chin Post
Mon ramkulh Chawngsung peng Yualuat khua no.1 primary sianginn ah ngakchia minung 5 sinin Covid-19 zawtnak an hmuh tiah mi bawmchantu phu hna nih an chim. December 18 ni ah rim theilo ngakchia pakhat sinin Covid-19 zawtnak an hmuh hnu ah ca chimtu saya, sayamah telhin minung 50 checkhlatnak an tuah hna i cu chung ah minung 4 sinin Covid-19 zawtnak an hmuh. Covid zawtnak hmuhmi ngakchia pakhat chungkhar cu zawtnak check an si hnu ah an pi sin in cu zawtnak cu an hmuh than ve.
A tu ah Yualuat khua no.1 primary sianginn ah Covid-19 zawtnak an hmuh caah caan karlak sianginn an kharnak hi a si. Thaizing December 22 ah cu sianginn ah ca cawngmi ngakchia hna le cachimtu hna cu zawtnak checkhlatnak tuah an si lai i, Covid zawtnak hmuh a si lo ah cun sianginn on thannak caah timhtuahnak an ngei. Chawngsung peng Yualuat khua ah primary sianginn 4 a um i, Covid zawtnak hmuh an silonak sianginn cu kharlo in an kai peng tiah theih a si.DVB, The Chin Post
Leave a Reply