Mizapi chung in 1250 An Thi, 9943 Tlaih An Tong Cang November 9 — Nihin tiang ah Ramkomh Kawlram ningpi ah Kawl Ralkap ruang ah sualnak ngei lo mizapi chung in 1250 an thi cang. Cun, 9943 tluk hi thongthlak balmi an si i, 1954 hi tlaihkhih ding in nawlchuah hnawh an si, tiah AAPP nih a than.
Nihin tiang a hmanungbik a thi tiah AAPP nih an thanhmi hi kanmah Chin ramkulh khualipi Hakha in a si. Amah cu Ralhrang nih October 12 kahdohnak a chuah hnu ah an rak tlaih i November 7 (Zarhpini) ah a thi tiah chungkhar sin ah Mithat Ralkap nih thawng an rak thanhmi Hniarlawnthar khuami Pu Rual Cung a si. AAPP:
CHRO nih Chin ramkulh le Kawlram nitlak lei ah a cang mi nuhrin covo kong Embassy upa biaruahnak a ngeih hna, Chin Human Rights Organization (CHRO) nih Kawlram chung ah a ummi Ambassador hna le Embassy in upa hna cu Chin ramkulh, Sagaing le Magway ramthen ah a cang mi nuhrin covo buarnak kong le cu nih a chuah pi mi mipi hartonnak, IDPs kong biaruahnak a ngeih hna tiah kan theih.
Hi biaruahnak cu Denmark Embassy thithruainak le hohatnak in 9 November 2021 ah sml pahnih chung tuah mi a si i Denmark Ambassador le CHRO in Salai Bawi Lian Mang le Salai Za UK Ling nih a bik in biachimnak le biaruahnak an ngeih hna. “Hramhram in uknak a la mi Min Aung Hlaing le a ralkap nih hriamnam thazaang in an kan det cuahmah. Sualnak ngei lo tampi an thih pin ah kan inn le lo tampi an hrawh, an kan khanghpiak.
Kan biakinn le biaknak he aa pehtlai mi inn lo an kan hrawhpiak, khanghpiak. Kan ram le inncia ah um awk tha ti lo in kan zam. Din ei, bawmnak, le kan nunnak caah a herh mi phanh khawh lo ding zeizongte an kan phih dih. Hi bantuk in Chin mi le Sagaing le Magway ah kan ton mi kong ah ramdang cozah nih zeitin tawlrel ding, khuakhan ding ti hi laklawh in an um ve. Cu kong cu a bik in theih an duh caah Denmark Embassy nih an kan tawlrel piak hi a si,” tiah Salai Za Uk Ling nih a chim.
“A bik in Chin mi kan nunnak le nun himnak caah India cozah nih kutka faakpi in a hun a hau. Mizoram cozah cu unau tiin zeipaoh a kan don. Timhcia in an um. Asinain, an duh tluk in Indian cozah lei nih pawlisi in a tlaih ve hna caah an cawlcang kho lo. Cun ramdang cozah le INGOs lei luhnak zong Indian cozah nih kan duhning in a hung lo.
Cucu ramdang cozah pawl nih India cozah lemsoi in atu kan mipi hartuarnak le tem-innak bawm khawhnak a um nakhnga bia kan ruah hna. A rak kai mi cozah palai (Embassy upa) zong nih kan i zuam lai, India cozah bia kan ruah hna lai an ti caah kan i lawm hringhran,” tiah The Chinland Post ah a chim chih. CHRO biaruahnak ah Denmark Embassy, British Embassy, German Embassy, Japan Embassy, Australian Embassy,
EU Embassy, Finland Embassy, New Zealand Embassy, US Embassy, Switzerland Embassy, Italy Embassy, France Embassy, Norway Embassy, Sweden Embassy le Czech Republic Embassy hna hna in Ambassadors, tuanvo ngeitu upa hna le UN zung in UN Secretary-General Envoy on Myanmar, OCHA le OHCHR palai an kai kho hna tiah kan theih. Hmanthlak: Rangoon um Denmark Embassy
Leave a Reply