NUG nih Rangoon ramthen chungah ralhrang nih PDF 39 le anmah bawmtu tiah ruahmi mi sawhsawh 8 an tlaih hna tia Nov 17 ah cathanh a chuahmi kong he pehtlai in NUG Cozah i Rangoon ramthen raldohnak lei tlangtlatu bu tlaih a tongmi PDF 20 leng an si tiah an fehter.
Tlaihmi hn hi Nov 12-17 chung kahdohnak he pehtlaihnak a ngeimi an si tiah ralhrangbu nih a thanhmi cu a hmaan ko nain a hmaan thlu lo tiah Ramthen raldohnak lei tlangtlabu thawngthanhnak tuanvo ngeitu nih a chim. Cu pa nih cun “Tlaihmi hna chungah kahdohnak i aa telmi zong an um bantukin mi sawhsawh zong an i tel.
Hi kongah i mawhchiat ding um lem lo. Dohnak timi ah tei le sungh cu um phung a si. Mipi himnak caah raltha taktak in a doha kan ralkap hna hi kan i uangthlar tuk hna” tiah a chim. PDF 20 leng an tlaih hna ning hi fiang tein theih a si lo. NUG nih D-Day a thanh hnuin NUG tang runvennak vuanci Southern Command nih,.
Pyan Hlwa Aung Oparation cu Rangoon, Bago le Ayeyawaddy ramthen chungah an lakpi i Rangoon khuahcungah kahdohnak le bomb puah a zual chin lengmang. Rangoon ramthen chung kahdohnak hna cu Southern Command tang i a ummi Rangoon ramthen raldohnak lei tlangtlabu nih an hruai hna tiah theih a si.
PDF chungtel tlaih a tongmi an tam ko nain Pyan Hlwa Aung Oparation cu kan ngol lai lo, hi nakin a fak deuhmi kahdohnak kan tuah lai i raltha tein na dir-onh khawh nakhnga rak i timtuah ti kha biacah kan duh tiah tuanvo ngeitu pakhat nih a chim. Mipi zong nih mah le zawn cio in ralhrang dohnak ah i tel ve ulaw PDF hna ca zongah thazaang a si lai tiah a chim fawn. Ref: Myanmar Now
Leave a Reply