Ralhrang Nih Chinnu An Tlaih Hrem Hoi

SAC ralhrang pathum nih nau no ngei kan Chin nu pakhat an tlaihhrem Chin Ramkulh, Chaklei Laitlang Tedim Peng chung um Aklui khua i kum 27 upa, nau no ngeika te nu pakhat cu SAC ralhrang pathum nih November 11 zaan ahkhan an tlaihhrem tiah thawng theih a si. Aklui khua hi Tedim-Kalay lampi kar ah a um mi khua a si i Kanedy tlang hram a um mi SAC ralhrang pathum nih an tlaihhrem hi a si tiah kan theih.

“An tlaihhrem lio ahhin a vapa zong a um. A vapa hi meithal in an hmuah i ti kholhnak khaan ah an bawhter. A lu tung lo ding in an velh an thuat i an pa hmai bak ah an sualpi,” min langhter duh lo pakhat nih a chim. An tlaihhrem ning hi voi hnih in, suimilaam 11 ah minung pathum nih le suimilaam 12 ah minung pahnih nih tiin an tlaihhrem. An tlaihhrem lawng si loin an sui thi le thil mansung zeimawzat zong an i kalpi tiah kan theih.

Nihin nikhat chung lawng ah Leirawitu Dalaan tiah zumh mi minung (11) thah an a si. Cu chung ah a cheu cu SAC ralhrang taang ah khuabawi a ttuan mi, SAC ralhrang taang ah hriam a tlai ve mi Phyosawthi zong an i tel tiah Khit Thit Media nih a tarlangh. Mandalay ramthen, Waidwin khuapi chung ah a um mi, Leirawitu Dalaan Tin Myo Tun cu nihin November 14, 2021 zing ah khan lakphak a din cuahmah lio ah an kah i a hmun ah a thi colh.

A mah hi mipi leirawitu, ralhrang sin ah thawngpang a pe lengmang tu a si tiah an chim. Cun ralhrang kut taang ah a cawlcang mi Dalaan ngan ngai a simi Zaw San zong nihin November 14, 2021 zinglei suimilam 9:00AM ah khan an kah thah khawh ve. Cu lawng si loin Mukok khuapi ah a um i ralhrang thawngpang petu Dalaan chungkhar minung (4) zong an dihlak in an thah khawh ve hna.

Cu bantuk in Yangon ramthen, Sagaing ramthen ti bantuk zong ah SAC ralhrang dirkamh tu lawng si loin Dalaan a ttuan mi minung zeimawzat an thah hna. Nihin nikhat lawng ah Dalaan le khuabawi ti bantuk in an thah mi hna dihlak hi minung(11) an si tiah Khit Thit Media nih cun a langhter.

Be the first to comment

Leave a Reply

Your email address will not be published.


*