Tlangcung hriamtlaibu dihlak i fonh in ralhrang rual doh i hrawh dingah le mipi kilven dingah rampi huap General Strike Committee nih April 24 halnak an tuah tiah theih a si.
Halnak cathanh an chuahmi cu a tanglei bantukin a si.
- Atu caan hi mipi dihlak, pakhat hmanh bau loin nawlngeihnak a latu ralhrang rual kha kan ral a si tiin doh lio caan a si. Mipi dihlak nih tlangcung hriamtlaibu hna nih ramkomh ralkap ser in nawlngeihnak a latu mithat lainawng phu hi hrawh cikcek dingah an i ruahchan tukmi a si. Hmasa deuh lio bantukin kha si loin ramkulh mipi hna lawng si loin Kawl mipi zong nih tlangcung hriamtlaibu hna cungah ruahchannak nganpi an ngei.
- Federal Democracy Ramkomhp ser ding hi nihin tiang a dai lomi rakhel buainak vialte i an hrampi a si tiah kan ruah. Myanmar cu tlangcung miphun tampi an umnak ram a si bantukin Federal Democracy Ramkomh sernak kongah ceihkhan a harnak tampi a um ko lai.
- Asinain nawlngeihnak a latu ralhrangbu hi a hram in kan hrawh hlan lo poah cu kan duhmi tuah khawhnak le a zalong i tlukruannak a ummi Federal Ramkomhpi cu zanmang lawngah a taang ko lai.
- Curuangah tlangcung hriamtlaibu hna nih i el awktlak thil a ummi hna kha a caan zoh thiam in biapi bik ah chiah rih loin kan zapi ral a simi doh le hrawh tu hi a biapi bik a si tiah kan ruah. Zapi ral kan tei hnuah kanmah kong cu tha tein ceihkhan than ding a si tiah kan ruah fawn.
- Mahca cun hriamtlaibu dihlak caankarlak i fonh in zapi ral kha doh le hrawh kha pakhatnak ah chiah dingin upatnak he kan in nawl/hal hna.
Rampi huap General Strike Committee ahhin ramkulh 7 le ramthen 7 chung i GS Committee vialte an i tel dih. Kanmah Chin zong an i tel. Hi kongah tlangcung hriamtlaibu hna lei in lehnak a um rih lo.
The Chin Post
Leave a Reply