Ralhrang kawl ralkap nih Muse CDM Siangcachim hna cu a phunphun in an thihpheih

Muse CDM Siangcachim Hna Cu A Phunphun In Thihpheih An Si

Shan ram chaklei Taluk ramri ah a um mi Muse ah ralhrangbu duhlo CDM cawlcanghnak ah a tel mi siangcachim pawl cu nanmah hrimhrim nan rat locun nan lahkhah kan in chuahpiak hna lai lo tiah ralhrangbu nih an ti hna tiah theih a si.

CDM ah aa tel mi siangcachim hna cu min an thut ter i lahkah an chuah ter hna hnuah May ni (3) ah rian ah lut than dingin a phunphun in an thihpheih hna.

“Mah bak nih lahkhah nan rak chuah lo ahcun kan chuah piak hna lailo. Cun May ni 3 ni ah Sianginn nan phanh i, rian ah nan lut than lai tiah Muse (No.) Sianguk nih nawl a chuah” tiah Muse Siangcachimh pakhat nih a chim tiah Shan Herald nih a ti.

Ralhrangbu nih May ni 5 in Sianginn on/hun than ding a timh caah Cacawnnak lei riantuan vialte rian luh than dingin a tu tein a phunphun in a kan namneh mi a si. “Lahkhah nan chuah khawh cun May 3 in rian ah nan lut lai an ti. Biana ah rian ah kan lut lo a si ahcun a kan chuah mi lahkhah vialte nan cham than lai tiah a kan thihphaih.” tiah CDM a lut ve mi Muse Sayamah pakhat nih a chim.

“High School Sayamah pakhat nihcun “ka lahkhah cu an duh ka phiat ko hna seh, la zong ka la lailo. Ralhrangbu kut tang hrimhrim ah rian ka tuan lailo, mah ruangah tlaihkhihnak a um si ahcun hrial ding a si ko” tiah a ti.

Letchiamyo Sianghngakchia pakhat nih “Sianginn a on/hun than zongah ka kai lailo, kan kai a si ahcun mipi a that cuahmah mi hi kan dirpi ve tihnak a si. Sal Cacawngnak cu kai ka duh lo” tiah a chim ve.

‘May 22 in Sianghngakchia pawl kan cohlan lai’ ti mi kongah Sianghngakchia nu le pa hna zong nih ‘kan fale cu Sianginn kan luh ter hna lailo’ an ti ve.

Mipi nih a kan duh ko ti in vawlei mit hmuh ah langhternak cu ralhrang council nih aa timh cuahmah mi a si. Khatalei ah CDM lutmi cozah riantuan pawl a bawm mi hna cu pohmah 505A in an inn le hmun tiang ah an tlaih cuahmah hna.

February ni 1 ralhrangbu in nawlngeihnak an lak hnuah Bank le cozah riantuan pawl CDM cawlcanghnak ruangah chawlehnak le cozah i thithruainak vialte cu tha tein a kal kho ti lo tiah theih a si.

The Chin Post