KNU Phapon pengkomh chung ah ralhrang riahbuk 11 cu ralhrang nih an chuahtak tiah KPSN nih cathanh an chuah.Ralhrang riakbuk hna cu KNLA nih thli thup in kah le bomhnak lam an phih dih caah an chuaktak hi a si.Mah chung ah ralhrang riakbuk 2 cu KNLA nih an lak khawh,.
Cupinah October thla dih tiang in Phapon pengkomh chung cu ralhrang a rak zaam mi 28 an um tiah KPSN nih ca thanh a chuah. Ralhrang in a zaam mi ralkap Ko Zaw Lwin Oo nih cun ralhrang chung in a tam deuh cu zaam a duh i ralhrang chung in thlahlawh tlawmtling in an pek lo pin ah nawlngeih nak um ti lo tiah a chim.” Ralhrang in azaam ding an tam. Nawl zulh ding hna cu an tam chin.
Sakhan in duh poh in leng an chuah ter hna lo, an zaam sual lai tiah. Sakhan ah minung 100 an um cun a zaam ding hi 99 cu a zaam ding lawng te an si” tiah achim. Phapon pengkomh chung ah lak khawh mi le an chuak tak mi tam deuh cu Thailand ramri a si mi Than Lwin Myint thluan Phapon pengkomh nichuah lei ah a si tiah KPSN cathanh chuahnak ah atel chih.
Tulio KNU zohkhenh mi hmunhma a si mi Phapon pengkomh Brigade 5 hmunhma chungah KNLA le ralhrang kar ah kahdohnak nifatin achuak i ralhrang lei in hmunhma an theih li ruang ah athi mi an tam chin tiah brigade 5 chim nak nawl ngei tu Duh Bochokgyi Saw Ga Lay Do nih a chim. Ref. Than Lwin Times.
Dr PC Lalramenga, Member, Mizoram State Level Expert Team on Covid-19 Management nih cun Covid-19 virus phundang in aa thleng mi ‘Omicron’ kongkau ah mizapi sin in biahalnak a tam caah le tihphannak le bia-alnak tampi a um fawn caah fiahnak tuah a hau, tiah a chim. Tu dirhmun ah hi virus thar a tihnun le tihnun lo fiang tein chim khawh a si rih lo kong le thiamsang hna nih a dothlat cuahmah lio a si kong le a tlawm bik ah zarh hnih tal hlathlai a hauh rih lai kong, a chim.
Dr PC Lalramenga nih cun Omicron virus kongkau chimfianhnak a peh colh. Hi virus hi a liamcia thla November ni 19 ah khan Africa ramthen, Botswana ram in South Africa ram ah dam lo ruang i a kal mi sin in an hmuh mi zawtnak a si, tiah a chim. Thiamsang hna nih ni thum chung dincatlo in an hlathlai hnu ah virus thar a si, tiah an fianh i WHO sin ah theihternak an tuah colh, WHO zong nih hlathlai chin a hau mi virus le ralrin hau mi zawtnak ah a phuan colh ve.
Dr PC Lalramenga nih cun covid-19 virus dang an hmuh cang mi delta variant hna nakin hi virus omicron nih hin hling tam deuh a ngeih caah midang he i chonh zong a let tampi in a fawi deuh lai, tiah a chim. Zarh hnih chung i South Africa chung zawtnak an karh ning nih tampi a fianhter, tiah a chim fawn. Nizan December 2 tiang ah khan vawleicung ram 23 ah omicron virus hi an hmuh cang kong le India Cozah le Mizoram state cozah zong hi virus kham ding in an i timhtuah lio kong a chim.
Dr PC Lalramenga nih cun Omicron virus cu dothlai cuahmah lio a si kong le a tihnun le tihnun lo kong zong fiang tein chim khawh a si rih lo, sihmanhsehlaw midang he chonh a fawi tuk mi zawtnak a si caah hnangam tein um ding a si lo, hi zawtnak lak in himnak ding ah a tha bik mi cu hmai huh, kut tawl le mibupi umnak ah midang he i naih lo a si ko, cozah nih covid rai he pehtlai in phungphai a ser mi zulh ahcun kan him ko lai, tiah a chim. The Chin Post
Leave a Reply