Sagaing ramthen Kalay-Gangaw lei in Pale peng chungah a lutmi ralhrang mawtaw rual hna le ke-hmaikal ralhrang 50 hrawng cu Bo Naga hruaimi Pale peng PDF, Battalion 5 in ralkap Maung Wei le a hawile nih Nov 13, tuzing 3:50am ah bomb pasarih an puahhnawh hna tiah Pale PDF nih cathanh an chuah. Ralhrang mawtaw rual le ke-hmaikal ralhrang 50 hrawng cu meithal puah pah in an ra i meng 59 le Ingdawpianh
Karlak Kyun Chaung hlei an phak ah Pale PDF nih bomh pasarih an puahhnawh hna i ralrhang 7 an thi i tam ngai hliam an tuar. Cu hnuah a thimi le hliam a tuarmi hna tuamhlawm dingin a rami ralhrang hna cu zanlei 4:00pm ah bomb 10 le miakpi 5 in an doh than hna i ralhrang lei cipkhap ti loin an thawng a dai. A hnu i kahdohnak hmun an va zohfel tikah ralhrang 30 leng an thi tiah Pale PDF nih an fehter.
Hramhram nawlngeihnak la tu ralhrang phu hna motor 30 leng cu Yaw mizapi vengtu ralkap YDF nih bomb in an puahhnawh hna, kutser launcher hna in an doh hna caah ralhrang phu lei bu pakhat tel in minung 15 leng an thi tiah YDF nih nizaan November 12 zaan ah thawngthanhnak an tuah. November 11 ni Gangaw in Kyaw lei ah a kalmi ralhrang motor 30 leng cu Pungngia tlang a kai leiah YDF phu nih bomb an puahhnawh hna,
Kutser launcher hna in lampi ah an doh hna caah ralhrang motor 5 cu an hliamh, ralhrang minung 15 leng an thi cun minung tampi nih hliamhma an tuar tiah theih a si. Cu kahdohnak chungah cun bu reng pakhat a thi i, ralhrang phu nih an bawi a simi cu helicopter in an kal pi, Yemyaitni sakhan-hmu zong fak ngai in hliamhma a tuar tiah YDF nih fehternak cathanh an chuah. Than Lwin Khet
Monywa-Amyint lampi Ngawngphyupin khuapawng ah palik hna nih an i citmi motor cu bomb puahhnawh a ton caah sakhan-hmu a thi tiah Monywa Lightning- PDF in rianngei pakhat nih a chim. Nizaan November 12, chunhnu suimilam 1:30 hrawngah palik phu hna nih an i citmi motor cu doh an tong. ” Kan theihmi thawngpang ning in lampi ah bawh in bomb kan hmanh, cu sakhan-hmu pa le a minung hna nih hin an luhnak khua paoh ah mipi hna cu tlerhkhonh nak an tuah zungzal hna caah a tu bantuk in kan doh hna hi a si” tiah Monywa lightning phu in chungtel pakhat nih a chim.
Puah puahhnawh a tongmi sakhan-hmu cu Ngawngphyupin khua palik sakhan ah a tuanmi a si, bomb puahhnawh in doh an ton caah hliamhma a tuar, Monywa sizung ah thlop ding in kalpi a si nain a hliamhma a fah tuk caah a thi tiah a chim. Nizaan zaanlei suimilam 4:00 hrawngah Ngawngphyupin palik sakhan cu doh an ton caah kaphnihkar kahdohnak a chuak, ralhrang phu hna nih minung thazaang an chap caah hnu kan tolh than tiah Monywa lightning phu rianngei pakhat nih cun a chim.
Kahdohnakah a chuah hnu ah palik minung thazaang an chap, nihin November 13 zinglei ah ralhrang phu hna nih drone in checkhlatnak an tuah tiah khuachung mi hna nih an chim. Amyint-Monywa lampi ah zaan suimilam 8:30 in deilei suimilam 3:00 kar ngandamnak kong he pehtlaimi dah chimlo i chawh lo dinging Monywa lightning phu hna nih November 9 ni ah theihternak cathanh an chuah. Mizzima
Leave a Reply