atchaung khua ah ralhraang nih duhpoh in hriamnam ngan an kah caah khuami pahnih an thi November 3, 2021 November 2 thawk in ralhraang nih Kalay peng Thlanglei an nawrchih caah tualchung mizapi vengtu PDF hna he kahdohnak faak ngai in a chuak. pawngkam khua hna cu duhpoh in meithal le hriamnam ngan in an kah. Kalay Thlanglei meng 15 hrawng ah a um mi Natchaung, Natmyaung le Chaunggwa khua hna ah hriamngan a tlak caah khuami an zaam tiah kan theih.
Natchaung khua ah hriamngan a tla i hliam tuar an um caah bawmh ding in a kal mi motor pakhat pawng ah bomb hriamngan a tla than i Yaw Eagle phu chungtel pahnih hma an pu tiah theih a si. Hriamngan tlak ruang ah Natchaung khuami nu ngakchia pakhat le Natchaung Thlanglei um U Maung Yi an thi tiah kan theih. Hriamnam ngan hi Kalay- Gangaw lam cung um, Sitha khu luh sianginn ah umhmun a khuar mi ralhraang pawl nih pehtlai in an kah lengmang mi a si tiah kan theih. Crd:
Ralhrang nih TV le Radio upadi cu an remh i a um ciami dantatnak hna pin ah thongdan zong an chap tiah theih a si. Hi kong hi ralhrangbu nih Nov 1 ah khan an rak thanh cang. TV le radio upadi pohmah 96 ah cun “Tangka sing 300 in sing 500 tiang” timi kha “A tlawmbik thongdan kum 3 in kum 5 tiang le tangka sing 300 in sing 500 tiang dantat khawh a si” tiah an thlen. Cun pinah pohmah 97 i “Tangka sing 50 in sing 100 tiang” timi cu “A tlawmbik thla 6 in a tam bik kumkhat thongdan le tangka sing 50 in sing 100 tiang dantat khawh a si” tiah an thlen fawn.
Cun pohmah 98 i “Tangka sing 100 in sing 300 tiang” timi cu “A tlawmbik thongdan kum 1 in kum 3 tiang le tangka sing 100 in sing 300 tiang dantat khawh a si” tiin siseh, pohmah 99 i “Tankga sing 300 in sing 500 tiang” timi cu “A tlawmbik thongdan kum 3 in kum 5 tiang le tangka sing 300 in sing 500 tiang dantat khawh a si” tiah an thlen. Cun an thlenmi ah a biapi ngaimi biatlang pakhat a um. Cucu hmasa upadi i “Internet i an thlahmi video le radio/audio hna an i tel lo” timi cu “Fimthiamnak pakhat khat hmangin thlah/taar a ngah lo” tiin a thlen i hihi online media hna a chim duhmi a si tiah media lei thiamsang hna nih an chim.
Ralhrangbu nih TV, Radio upadi an remh/thlenmi hi Online i video le catialmi zong a huap i dantat khawh a sinak kong kum tampi Journalist a tuanmi U Myint Kyaw nih a chim. “Hi upadi remhmi nih online i video hna zong dantatnak a sinak a langhter. Upadi an remhmi zong hmasa ah um lomi thongdan a tlawmbik kum 3 in kum 5 tiang ti hna aa tel cang. Hihi amahkhan a ngah lomi a si i palek nih tuanvo lak khawhmi pohmah ah an thlenmi a si.
A tawinak in kan chim ahcun online video le catial pawl dantat khawhnak ding caah an tuahmi a si tiah ka ruah” tiin U Myint Kyaw nih cun a chim. Atu bantukin ralhrangbu nih TV le radio upadi an remh, an chapmi hi ram mipi hna nih zalong tein thawngpang theih khawhnak kha phih le kham an duh caah a si tiah Journalist pakhat nih a chim ve. Ralhrangbu nih TV le radio upadi an remhmi kong he pehtlai in UN tangah a ummi UNESCO nih cun Nov 2, tuni ah Myanmar ramhcung i media riantuantu hna caah thinphang a sinak an chim ve.
UN GS i a pumpak chimnak nawlngeitu Farhan Haq nih cun “Myanmar ah media riantuantu hna tlaihkhih le hremnak cu thinphang le lungrethei dirhmun taktak a si ko. Thawngpang, ruahnak le hmuhning hna zong zalong tein chimrel kho lo dingin phih le kham an si” tiah a chim. Ralhrang nih nawlngeihnak an lak in thla 9 chungah tlaih a tongmi journalist 120 renglo an si i nu 7 an i tel. Tam deuh cu thlah an si cang nain atu tiang hren a si rihmi 47 an um tiah theih a si. Cun nawlngeihnak lak hnuah licence chuhmi media ngan 9 an um i aa dinmi media 20 an um fawn. Cun dantatmi media 4 an um i luhhnawh a tongmi media 9 an um tiah theih a si fawn. Source: Mizzima/VOA
Leave a Reply