Ralbawi Aung Myo Htet Cu CDM A Tuah I Mipi Sinah Aa Fonh Cang

Ralbawi Aung Myo Htet Cu CDM A Tuah I Mipi Sinah Aa Fonh Cang: Tat-mah 66, Khah-lah-yah -80 (Inma) in ralkap sianghleirun a dihmi ralbawi Aung Myo Htet cu ralhrangbu hnuchit in CDM a tuah i mipi sinah aa fonh cang tiah Peoples Soldiers bu nih cathanh an chuah.

People Soldiers bu cathanh ah cun “Ralkap sianghleirun a zarh 52 nak in a dihmi Boci Aung Myo Htet cu ralhrangbu hnuchit in mipi sinah aa fonh cang. Ralhrang hna chungah CDM tuah in mipi sinah fonh a duhmi an tam. Ralhrangbu hnuchit in kaltak a duhmi hna nih People Soldies bu sinah pehtlaihnak kan tuah u. Man a ngei ti lomi ralhrangbu tangah maw nan tuan lai? Asiloah man ngei tein dah mipi ralkap nan tuan lai ti kha raltha tein i thim ko u” tiah an langhter.

Rangoon Khualai Ralhrang Umnak Hmun Pakhat Rangoon PDF Nih An Kah, Ralrang 4 An Thi: Rangoon khuapi, Botataung peng, Botataung bazar lam le Maha Bandulah lam tonnak i PK pawl an zung ah hmunhma a khuarmi ralhrang hna cu Rangoon PDF nih Oct 23, tuzing zinglei ah an kah hna i ralhrang pali an thi tiah Rangoon PDF chungtel hna sin in theih a si. 

Rangoon PDF chungtel S21 (minhleng) nih “Banker sakhan chungah ralhrang palai an thi, kanmah lei cu hliamtuar pakhat hmanh um loin hnu kan tolh kho” tiah a chim.

Phekhone PDF Nih Khah-Mah Yah 336 Battalion An Kah, Ralhrang 5 An Thi, Meithal Zun 5 An Lak Khawh: Shan ramkulh thlanglei Phekhune khua hrambunh ralhrangbu kei-ralkap battalion khah-mah-yah 336 cu Oct 22 zaan suimilam pakua le cheu hrawngah Phekhune PDF nih an kah i ralhrang 5 an thi tiah Phekhune PDF nih an thanh.

Ralhrang nih an hmanmi MA3 meithal zun thum, MA2 meithal zung khat le MA1 meithal zun khat cu Phekhune PDF nih an lak hnuah hliatuar um lo tein hnu an tolh kho.

Fox Army-HPDF Nih Pahnih Bomb In An Puah: Oct 23, tuzing zinglei suimilam 5 hrawngah Mandalay in Shweku lei ah a kalmi mawtaw pahnih cu Fox Army-HPDF nih bomb kan puah tiah an thanh. Mawtaw mawngtu le a bawmtu (spare) pa hliam an tuar. Mawtaw seh (engine) le an phurhmi detsi pung zong a rawk tiah Fox Army-HPDF nih an cathanh ah an langhter.

Cucaah atu bantukin a can than lonak dingah mipi khual a tlawngmi mipi nih Fox Army-HPDF thanhmi hna kha zulh cio dingah Fox Army-HPDF nih a thar in theihternak an tuah than. Sagaing ramthen chungah zaan 7:00pm in zing 5:00am tiang chawhvah lo dingin Oct 6 ah khan SPDF nih ralrin peknak cathanh an rak chuah cang. (Kachin News Group)

The Chin Post