Lungler SAC Sakhan Kah Dingin Timhtuahnak
=================================
September 9, 2021 kha Lungler SAC Sakhan kah i laak dingin kan i thawh nain kan rak ṭhul ṭhan. September 5 ah Zahnak Battalion in Vice Chiarman Henry Hniang Cung (tulio kan commander) le kan advisor Pu Lal Om Pui, ka pa pui ( tulio kan Vice Chiarman) cu tlaang tlawn dingin an i thawh i Lungler Rungvengtu Phu cu kan camp ah riak dingin thawng an kan thanh. Ka nau le pahnih nih an dawn hna i kei zong ka khualtlawnnak in ka rak tlung.
September 6, 2021 ah Lungler ah khuanu khuapa he biahruahnak le SAC ralkap he pehtlai in ralrinnak tete pek ṭhannak kan ngei, a ruang cu August 13, 2021 ah Lungler SAC an lubik kha meithal puak loin tlaih kan rak timhmi information kan control khawh lo ruangah kan rak tlolh bal.
September 6, 2021 ah Ralpel khua mi hna he biahruahnak kan ngei. Kan meeting lioah Zahnak kan Chiarman Salai Ṭial Hram Ling sinin phone a ra nain meeting chung si caah ka tlai lo, a voi a tam caah ka nau pakhat ka tleihter i a biapi tuk mi a si a ti. Phone cu ka chawnh i Farrawn khua ah tuzan vun phan seh tiah CNA kan pu le nih an in ti a ka ti. Farrawn cu zanlei muilai ah kan phan. Culio ah CNA ralkap minung 45 cu an rak i tlaar (ṭansi an tuah).
CNA kan pu Sang nih vun i din law zaan ah biahruahnak kan ngei hna lai ti. Khua ka ruahmi cu Lungler Rungvengtu Phu nih hlah maw hriam kan tlaihnak ah kan i palhmi um hnga aw ti ka ti. Zaan ahcun Zahnak kan commander hlun Khin Mawng Win, CNA kan pule pahnih he tiin zeitindah Lungler SAC Sakhan kan kah lai, khoika hmun in tibantukk kan i ceih dih hnuah Zahnak Battalion in minung 50 i thawh hna sehlaw na ralkap minung 20 in i thawh ve uh tiah pu Sang nih minung a kan hal.
Kei nih Thantlang CDF ka hawile teh ka ti i minung kan tam tuk ahcun a ṭha lai lo. CNA in 45, Zahnak in 50 le Lungler in 20 kan si ahcun a za ko an ti. Cun Zahnak Battalion kan Commander nih kan kah hlanah bawlung kan chuihpi law bomb an kamh mi hi hrawh kai zuam lai a ka ti. September 8 zaan ah Fungkah khua ah i tong dingin biakhiahnak kan tuah.
September 7, 2021 ah kan tlung i kan ralkap an dihlak le admin cu camp ah um dih dingin thawng kan i thanh hna. Bawlung chuih dingah kan khuabawi nawl kan hal piak kan ti nain a tlamtling lo. Cerhtual le SAC sakhan hi aa tlai mi a si caah kan uniform kan i phoih i bawlung chuih ah kan kai chih. Bawlcung chuih kan vun thawkka ah sakhan chungin an vun ka kawh! Meithal kan i ken lo caah ka thinphang ngaingai. Ziah bawlung cu nan chuih tiah lunghrinh ngai in bia an ka hal (SAC pawl nih hin bawlung kan chuih ni le caan hi an theih ve).
Ka leh mi hna cu i zuamcawh mi a si ka team pawl kan tling lo tuk i ka team ah ra ve u ca ka ti hna. Asinain kan si kho lai lo an ti, a ruang cu thlakhat renglo an sakhan in an chuak duh ti lo. Bia an ka cah mi cu bomb kan tarh mi a um caah cu hmun, kha hmun i bawlung a rilh ahcun kal hlah uh an ti. Tlawmpal ah cerhtual liam deuh ah kan i din. Cu lio ah commander le a nau le cu ramtang in cerhtual ah an rak kai ve. Lente kan i celh pah cun luhnak ding le thil sining kan zoh! Cun coffee pakhat kan cawk i an sakhan hmaiah ka nau pakhat he kan va pek hna.
Ka nau pakhat nih a ṭih ngai rua, an ka theih sual lai tiah tlawmpal ai laamter. September 8 kan phan i khua a muih in Fungkah khua ah cun CNA kan pu le kan hawile sinah kal kan i thawh ṭhan. Farrawn in kan tlun pah ah Thangzang khua pawngah CDF Thantlang kan chairman te he bia kan i ruahmi a tlamtling i CDF Thantlang kan Commander le a team pawl zong an ra kho. Kan voikhat i tonnak a si i kan lau ngai veve. A ruang cu Thantlang lawngah kan i kom i CDF kan luh kha kan i thei ve ve lo.
Kan cawlcang dan ning kong kan fehter hnuah kan saikal le mawṭaw mit ceuter loin ruahsur lakah Lungler lei cu kan panh hna. Muih si, nawncek lak si, a fawi lo. CNA minung 50 renglo, CDF Thantlang kan Commander team 12, Zahnak Battalion kan commander le a team 11 le Lungler Rungvengtu Phu minung 23 cu phu ruk ah kan vun i ṭhen. CDF Thantlang CC team le ka naule minung 10 cu SAC Sakhan he hmaitonh in a ummi Pura ah hmunhma kan la. Kan meithal hi short-gun 1, Rifle 1, KA 2 le Laiser thonghrolh rumro an si hna nain kan dir-onh ve ko hna. Sakhan lak ding cun ral kan tuk bal lo caah kan thawchuah in kan thinphan ning aa thei, a phang lo tiah i pheh awk ṭha lo.
Hruaitu kan si caah kan naule cu ralṭha dingin forh an hau rih. September 9 zinglei suimilam 5 ah kah ding kan timi cu order a chuak ti lo. Tlawmpal ah rak kir uh tiah order (nawl) a chuak. Kan kal lei i Uico an rak thah lomi nih a kan baoh ruangah lam dangin kan kir. Lam pial kan phak ah SAC Sakhan cun mei an vun kan ceuh caah kan bawk dih. Lam a kan hruaitu le a hnuzul cu a rak lan diam ai. Ka zulh mi kha lam thei lo mi Thangtlang Battalion kan ralkap si kaw, lam a pit i muilak ah cun kan i vai. Lam hruai cu ka vun chawn ve, khua a muih tuk caah pe 10 renglo a sangmi lamtlang ah ka tla. Ka lau tuk nain aw chuah awk a ṭha lo.
Ka hnu ummi hna zong an tla ve, an tlaak thawng a thang deuh le a din deuh lawng an si. Kan zatein Bungkhua ah kan i tong ṭhan hna i kan i din hna. Zahnak Battalion in Ralpel khuami minung 10 an ra ṭhan. Nu pakhat ai tel. Phu 6 ah ai ṭhenmi kha mi an vun i chap caah phu 7 ah kan ṭhen ṭhan. An phu min kha 07 kan pek hna i CNA, Ralpel le Lungler kan fonh hna.
Kah ding caan kan khiahmi ah SAC Sakhan kan kah lonak a ruang cu CNA hi a tam-u cu Lungler sakhan an phan bal lo. Keimah nih hmunhma ka peknak hna a si caah a tlamtling lo. Hriamngan zong hman dingah an i lunghmuih lo. Cu caah zanlei sumilam 3 ah phu 7 chung i an hruaitu minung pahnih cio le lam hruaitu ding kan kawh hna i hmunhma zoh ah kan kal ṭhan. SAC nih meithal an puah tuk nain kan hmunhma cio kan zohchih.
An hriamngam chiahnak zong drone in kan zoh ta. Meithal a puah tuk caah Bungkhua ah kan kir. SAC an cawlcangh ning zoh ṭhan a herh caah CNA pakhat le ka naupa he Lungler khua helnak leiin hriamnam he kan rak lut ṭhan. Zaan ah Lungler khuami cu an nun himnak ding caah biakiin le inn ngan deuh ah hmunkhat teah um dingin kan chim hna.
Ṭuanvongeitu hna nih an zohkhenh hna. Cun kanmah zong nih nan thinphang hlah uh, tiah an umnak ah kan va veh hna hnuah Sakhan he hmaitonh a simi inn pakhat ah kan riak. Zinglei suimilam 3:15am ah kan tho i Lungler SAC Sakhan kap dingin kan i tonnak ding hmun ah kan kal. Biakilh: “Lungler Sakhan Hnulei Thilthup” tiin cauk chuah kan timh caah Lungler sakhan laknak kong cu ka langhter rih lo.
By. Aung Aung (Ram caah nunthap in ral a domi pakhat) Theihternak: Hi a cunglei ca hi a ṭialtu lungtlinnak tein a biafang palhmi tete kan remh i kan rak post mi a si.
Relchap, Paletwa Khuami Pakhat Cu Bomb Lamhsualnak In A Ke Aa Hliam!, Chin ramkulh, Paletwa peng ah tualchung mi pakhat cu lo a kalnak ah bomb aa lamhsual i hliam fak ngai a pu, tiah theih a si. Nihin Septber 9 zinglei ah Paletwa peng, Ngapui (ငပှိး) khuami kum 30 hrawng simi pa pakhat cu lo kalnak in a tlun lei ah bomb aa lamh sual i a kee khat lei cu a maan dih, atu hi Paletwa Sii-inn ah an kalpi, tiah tualchungmi pakhat sin in kan theih.
“A hliam tuarning hi a fak ngai! A ke khatlei cu lak awk a tlak lo, a maan dih caah tan a hau lai, amah hi lo a kal i a tlun pah ah kaw-awm(fangvui) a la pah i lo chung ah bomb aa lamh hi a si. Atu bantuk in lam zong si lo mi lo chung tiang in bomb an chiah mi hi cu amah an chiah hnawh hramhram mi a lo,” tiah tualchung mi pakhat nih cun a chim.
August Thlachung Ah Tlaih A Tongmi Rohingya 56 Cu Kum 2 Thong Thlak Dingin SAC Nih Bia An Ceihpiak Hna!, Ayeyawaddy ramṭhen, Wakema peng ah SAC ralkap nih August thla i an rak tlaihmi Rohingya mi 56 hna cu Wakema SAC biaceihzung nih kum 2 thong thlak ding in nawl an chuah, tiah palik he naihniam mi pakhat nih a chim.
Rammi sinak ngei lo Rohingya mi 56 hna cu a luancia August 22 ahkhan Rakhine in Yangon lei ah tilawng in an kal lio ah SAC ralkap nih an rak tlaih hna. Wakema peng SAC ralkap nih an tlaihmi hna Rohingya mi hna cu SAC ralkap nih ei le din ṭuanvo an lak duh hna lo caah August ni 23 thawk in tualchungmi nih ṭuanvo an rak lak hna, tiah theih Rohingya bawmchantu pakhat nih a chim.
Myawady-Wawlay Lampi Ah SAC Ralbawi Pakhat Le Ralkap Dang 5 Cu KNLA Nih An Tlaih Hna, Karen ramkulh, Myawady peng Myawady-Wawlay lampi ah hriamnam le riahcaw a phortu SAC ralkap khah-mah-yiah 102 in captain Ye Yint Maung hruaimi ralkap 6 hna cu September 9, zinglei suimilam 10:30 ah KNLA phufonh nih an tlaih hna, tiah theih a si. Tat-mah 22 kuttang um khah-mah-yiah 102 in captain Ye Yint Maung hruaimi ralkap hmaikal hna cu an thilri phorhmi he KNLA battalion 27 le Cobra phu nih an hriamnam tamlakte he an tlaih hna, tiah theih a si.
KNLA lei nih cun MA-3 meithal 2, MA-1 meithal 1, MA-4 meithal 1, MA-5 meithal 1, kuanbawm 17, kuanbawm a pummi pakhat, kut cheh bomb lung 2, BSA1 pakhat, 5.56 kuan 600, 40mm bomb lung 200, 60mm bomb lung 200, khoh-suai(riahcaw) bawm(ṭhoh) 12 an lak, tiah theih a si.
Yinmarbin Le Kani Peng Ni 12 Chung Kahdohnak Ah SAC Ralkap 40 An Thi, PDF 5 Nunnak A Liam, Sagaing ramṭhen, Yinmarbin le Kani peng, August 19 in August 30 tiang kahdohnak ah SAC ralkap 40 nak tlawmlo an thi, tiah Triple Tow Task phu in ṭuanvo ngeitu Ko Nay Kyi nih a chim. Ni 12 chung kahdohnak cu Yinpaungtaing(ရင်ပေါင်တိုင်) khua kahdohnak in aa thawk i, SAC ralkap nih helicopter in minung thazaang 200 hrawng an chap leng ah SAC ralkap hna cu civil mi lemcang in kahdohnak ah an i tel caah tualchung hriamtlai PDF chungtel 5 an nunnak a liam, tiah theih a si.
Yinpaungtaing (ရင်ပေါင်တိုင်), Tikune(သီးကုန်), Winkune(ဝင်းကုန်း), Yingandaw(သင်္ဃန်းတော) khua le Yakyi-Kalaywah lampi pawng kahdohnak hna cu an fak ngai i, Winkune (ဝင်းကုန်း) khua pawng a cangmi kahdohnak ah SAC ralkap 30 nak tlawm lo an thi, tiah theih a si. “Kaphnih kar kahdohnak cu August 19 in thawk a si i, ni 12 chung an rau. Cu kahdohnak ah cun SAC ralkap 40 hrawng an thi i, PDF lei in ralkap 5 an nunnak a liam. Ni 12 chung kahdohnak ah SAC ralkap a thi mi an tam biknak cu Winkune (ဝင်းကုန်း) khua kahdohnak ah a si i, minung 30 hrawng an thi,” tiah Triple Tow Task Force in ṭuanvo ngeitu Ko Nay Kyi nih a chim.
Yinmarbin peng, Winkune (ဝင်းကုန်း) khua kahdohnak ah cun KIA nih an bawmh hna i, ni 12 chung a cangmi kahdohnak ah SAC ralkap nih raltuknak vanlawng zong an hman, tiah theih a si. SAC ralkap hna cu Triple Tow Task Force, Monywa special force, Chindwin Ganungyaza(ချင်းတွင်းဂဠုန်ရာဇာ), Yoemah Fighter, Yinmarbin Local PDF, Dragon Brothers Task Force, Yinmarbin pengkomh battalion 1, Monywa Truth of Force phufonh nih an kah hna, tiah theih a si.
Sagaing Ramṭhen, Myinmu Peng Ah SAC Ralkap Motor 11 Cu PDF Nih Bomb An Puah Hna I Ralkap 12 An Thi!: Sagaing ramṭhen, Nyinmu peng ah nihin September 9, chun suimilam 12:16 ah SAC ralkap motor 11 cu PDF nih voi 2 bomb an puahhnawh hna caah SAC ralkap 12 an thi, tiah theih a si.
“Monywa in a chuakmi SAC ralkap hna cu a voikhatnak ah Htisaung(ထီးဆောင်း) le Ganpia(ကံပြား) kar ah pa-de-ta bomb lung 9 kan puahhnawh hna. Cun, Nabekyu(နဘဲကြူး) le Pyawt(ပျော့) khua kar ah a voihnihnak pa-de-ta bomb lung 5 puahhnawh kan puah ṭhan hna. Voihnih tiang bomb kan puahnak ah SAC ralkap 12 an thi i, a thimi SAC ralkap ruak cu Myinmu lei ah an kalpi hna,” tiah Zero pah-kah-phah in ṭuanvo ngeitu Ko That Kyi nih a chim.
Gangaw Peng Hartongmi Bawmhnak Pekmi Facang Pung 150 Leng Cu SAC Ralkap Nih An Hlonhpiak Hna! Magway ramṭhen, Gangaw peng Shwetaung (ရွှေတောင်) khua a khaangtu SAC ralkap hna nih, an rak khangh cangmi Mauk(မောက်) khua mipi sin ah bawmhnak pekding mi facang pung 150 leng cu an hlonh/vorhpiak dih hna, tiah Yaw ralzaam bawmtu committee nih an thanh.
SAC ralkap hna cu September 6 ah Shwetaung(ရွှေတောင်) khua chung ah an lut i, tualchung mi hna thilri le an inn cu an khanghpiak dih hna leng ah, facang pung 150 leng zong an hlonhpiak dih hna, tiah an chim. Magway ramṭhen, Yaw hmunram um ralzaam hna ṭhutdirnak, eidin, ngandamnak le fimcawnnak ca ah a herhmi kip cu Yaw ramchung ralzaam hna bawmtu committee YRCIDP nih bawmhnak an pek tawn hna, atu zong ah tampi bawmh an herh rih, tiah ralzaam tawlreltu nih an langhter.
Mindat Peng Kahdohnak Ah SAC Ralkap 3 An Thi, SAC Ralkap Nih Shan Ram Ah Vanlawng An Hman! Chin ramkulh, Mindat peng zong ah nihin September 9 zinglei suimilam 11:35 ah CDF-Mindat le SAC ralkap kar kahdohnak a chuak i, kahdohnak ah SAC ralkap 3 an thih lengah hliamhma tuar an tam, tiah CDF-Mindat nih cathanh an chuah.
Shan ramkulh lei zong ah kahdohnak faak ngai a chuak i, SAC ralkap nih raltuknak vanlawng an hman, tiah theih a si. Nihin September 9, zinglei in Shan ramkulh, Moebyel(မိုးဗွဲ) ah hriamngan in kahdohnak an tuah i, minung thazaang an chap. Tank le raltuknak motor tampi cu Moebyel(မိုးဗွဲ) lei ah an kal i, zaanlei suimilam 3:00 luan ah raltuknak vanlawng in kahdohnak an tuah, tiah tualchung mi nih an chim.
“Zinglei in hriamngan kuan tam tuk an thlah, Moebyel(မိုးဗွဲ) khualeng lei ah cun chunnitlak kahdohnak a fak, hriamngan thawng cu khuachung in voi tamtuk kan theih. Zaanlei suimilam 3:00 luan hrawng ah vanlawng in bomb an thlak i, khuachung unmi pawl cu ahohmanh leng ah an chuak ngam lo” tiah
Moebyel(မိုးဗွဲ) khuami pakhat nih a chim.
September 8, zaanlei suimilam 3:48 ah Monywa-Mandalay lam, Monywa-Chaung U lampi hmun khat ah Sagaing in a rak chuakmi SAC ralkap motor 8 cu pa-de-ta bomb lung 3 kan puahhnawh hna i, SAC ralkap chungtel 6 an thi, tiah People’s Defence Force – South Monywa nih cathanh an chuah.
Bʀɪᴛᴀɪɴ Sɪᴀɴɢᴘᴀʜʀᴀɴɢ Nᴜ Qᴜᴇᴇɴ Eʟɪᴢᴀʙᴇᴛʜ Cᴜ Bᴀʟᴍᴏʀᴀʟ Sɪᴀɴɢᴘᴀʜʀᴀɴɢ Iɴɴ, Sᴄᴏᴛʟᴀɴᴅ Aʜ Nɪᴢᴀɴ Zᴀɴᴛ̣ɪᴍ Aʜ Kʜᴀɴ A Nᴜɴɴᴀᴋ A Lɪᴀᴍ! Vawleicung ram kau bik a rak uktu Britain siangpahrang nu Queen Elizabeth II, kum 96 cu nizan September 8, Myanmar lei caan in zanṭim 12 le cheu hrawng ah khan a nunnak a liam. Queen Elizabeth hi tukum February thla dongh lei ah khan covid zawtnak in a rak zaw i, cu hnu in ngandamlonak nih a tlak.
British nih an rak ukpenmi ram hna lentecelhnak ‘Commonwealth Games’ zong ah caan hmang ding a si nain a rak i ṭhulh. A ngandamlonak cu zual lei a panh caah Balmoral Castle(Siangpahrang Inn), Scotland ah i zohkhenh ding in a kal i, Balmoral Castle ah hin Queen Elizabeth cu a nunnak a liam beh. Vawleicung bawi vialte lak ah a lianngan cemmi pakhat ah ruah mi Queen Elizabeth hi Britain ram tuanbia ah Siangpahrang chan sau bik a si i, kum 70 chung siangpahrang rian a ṭuan.
Kum 1926 ah khan London khuapi ah a chuak i, kum 1947 ah Prince Philip(Duke of Edinburg), Greece le Denmark siangpahrang fapa he an rak i um. Kum 1953, kum 25 a si lio ah hringtu a pa King George V nih a thihtak caah Siangpahrang rian a chawn. Nikum 2021 April ah khan a pasal Prince Philip nih mual a rak liamtak cang.
Queen Elizabeth a thih hin a fapa Prince Charles cu Siangpahrang a si colh. Queen Elizabeth a thih kong Buckingham Palace nih an thanh sin in vawleicung khuazakip a cul dih colh i, vawleicung ram hruaitu le minthang tampi nih Siangpahrang nu an uinak kong an taar cio. British phungning ah siangpahrang an thih ahcun ram pumpi in ruak humhnak ngeih ding a si caah cozah cawlcanghnak zong ni 10 an i din lai i, UK phaisa Pound Sterling zong an remh lai. Crd-The Chin Post
Leave a Reply