KNDF Ralbawi Pakhat A Nunnak A Liam
Demoso pengkulh ah SAC ralhrang a kahdoht mi KNDF Tatyin (10) in Corporal Sergeant a si mi Saw Ka Paw Htu cu nizaan May ni 9 ralhmai a kai nak hmun pakhat a nunnak a liam tiah tehih a si.
Chin Pasal Tha Salai Stephen Biak Tha Thawng A Nunnak Liam, Kalay peng ralram hmun pakhat ah nizaan May 9 ah mizapi ralkap Salai Stephen Biak Tha Thawng a nunnak a liam tiah kan theih. Chungkhar he naihniam mi pakhat nih ” kan naupa hi PDF-Kalay ralkap a si, nizaan May 9 ralram hmun pakhat ah a nunnak a liam tiah thawng ka theih ve” tiah a chim. Ralhrang thawngzamhnak nih cun ” nizaan May 9 zaanlei suimilam 1:00pm ah hmun thianhhlimhnak tuahmi hna nih,
Yeshin khua ah PDF pakhat ruak le hriamnam India serchuah 30.06 Sporting Rifle phun le Sniper pakhat, 30.06 Sporting Rifle kuan 3, Ak kuan bawm 3, 5.56 mm kuan 52, kutser bomb 1, Baofeng biachimnak phun 2 kan lak tiah an langhter. PDF Kalay nih cun May 9 zinglei suimilam 8:00am in zaanlei suimilam 4:00pm tiang Yeshin khua pawng kahdohnak ah ralhrang 4 an thi i, PDF Kalay in minung 2 nih le ram caah an nunnak a liam tiah cathanh an chuah.
Relchap, Sagaing ramṭhen chung SAC ralkap nih an khangh mi khua hna chung in khua pakhat ca ah Kya Tanat(ကျားသစ်နက်)-PDF nih chungkhar pakhat ah 50,000 Mmk bawmhnak an pek hna, tiah theih a si. Chungkhar 104 ca ah sing 52 tluk cu inn an sak ṭhan khawhnak ding caah kan bawmh hna, tiah Kya Tanat (ကျားသစ်နက်) PDF in ṭuanvo ngeitu pakhat nih a chim.
“Phaisa cu umnak ding ca ah a har mi mizapi umnak caah hlut mi a si. Mipi hi kan herh bik hna le kan zei zongte an si caah, mipi an harnak cu kan harnak a si ve,” tiah Kya Tanat (ကျားသစ်နက်)PDF in ṭuanvo ngeitu nih cun a chim. Sagaing ramṭhen chung ah khua tampi cu SAC ralkap nih meikhangh in an hrawhpiak hna i, mah umnak ah um ngam lo in ralzaam dirhmun a phan mi minung 2,40,600 an um lio, tiah UNOCHA Myanmar nih a thanh.
ChawngOo-Pakokko Karlak Ah SAC Ralkap Motor Bomb Puahhnawh An Tong: ChawngOo-Pakokko lampi ah a um mi khua pakhat ah khuachung mipi hna thilri a firtu, SAC ralkap motor 3 in a kal mi hna cu bomb puahhnawh an ton caah a thi mi an tam, tiah Sagaing ramṭhen battalion-4(MSPDF) nih nihin May 10 ah an thanh. Nizaan May 9, zinglei suimilam 4:45 hrawng ah SAC ralkap hna cu bomb puahhnawh an tong i, Bomb puahnak ah cun Myinchain pengkomh battalion 1(27 revolution force), Natogyi Regional Defense Force le Myinchain (မြင်းခြံ) pengkomh battalion 3(Mayelatt PDF) phufonh hna an i bawm, tiah theih a si.
“SAC ralkap hna cu bomb lung 3 puahhnawh in doh an si i, motor pakhat cu a rawh ning zong a fak ngai,” tiah MSPDF in ṭuanvo ngeitu nih People’s Spring ah a chim. Kahdohnak ruangah minung a thi mi zat cu fiang tein langhter a si lo. May 7 Myaung pengchung ah rallam a sialtu SAC ralkap hna cu bomb puahhnawh in doh an ton caah minung 2 an thi i, midang 5 nih fak ngai in hliam an tuar, tiah MSPDF nih a thanh.
Leave a Reply