Putin, Nitlak Le Ram Hna Nih Ukarine Bomhnak Nan Peek Mi Hi Ngol Cang Uh
Ukraine President Zelensky cu thazaang peeknak an peek i, a ralkap phu hna sinah hriamnam peeknak pawl hi nitlak lei ram hna nih daihter ngol dingah le le Ukraine kahdohnak hi aran khawh chungin ilim ding ah nitlak lei ram hna nih bomhnak an peek nak kong cu Putin nih a chim. France president he biaruahnak an ngeih lio zongah France nih kahdoh daihnak hi tonbiaruahnak in daihter ding in Putin cu a chimh i, nan ngol lo ah cun kan i tong hna lai ti ko si ko.
Mariupol khuapi ah a um mi mipi pawl bochanh nak nawl ngeih ding in Frace nih putin cu a nawl tiah theih a si. Mah khuapi kahdohnak ah Ukraine ralkap hna nih ukmi Steel sehzung a rawh hnuah, mah kaa ah cun mipi pawl a thawng in a phihkham hna tiah theih a si. Russia kahdohnak ah Ukraine cu nitlak lei ram hna nih hraimnam ttha ttha an bomhnak an peek i,
Nizaan zongah Britain nih Electronics hraimnam pawl, Radar system le GPS pawl telin Pound 300 million man a si mi hraimnam pawl bomhnak peek dingah theihter nak a tuah. Ukraine cu Russia kahdohnak aton hnu ah a thong leng in mipi an nunnak a liam cang i, ram dang ah ralzaam dirhmun in 5.5 Million leng an um cang tiah theih a si.
Ukraine dohnak ah Beijing nih Russia bomh timh phunphai in a um caah a liamcia thla 2 ah khan US nih China cu ralrin a pek bal. Asinain, China nih a ralkap le chawva in Russia a bomhnak an hmuh lo tikah US-China pehtlaihnak thancho a panh bantuk ah a cang, tiah US senior officials nih an chim. Buaktlak in China nih Russia a dirkamh pengmi zoh tikah kan lungre lawng a thei. Asinain, ralkap thazaang le chawva in Russia a bomh, ti a um lo caah a tutiang ko rih cu kan lungretheihnak ai ning ngaingai. A tubantuk a biapitukmi caan chungah kan thawchuah a vun i ning ngai, tiah US officials nih an chim.
Tu thla dongh lei ah Biden hi Asia tlawn ai tim i, China a thanchonak tuaktan dingah kal ai timh hi a si. A thawng taktakmi ram ah ai chuahmi China he pehtlain in a hmasabik a national security strategy zong a rauh hlan ah a vun langhter te lai, ti asi. “Russia nih Ukraine a tuknak ah PRC (China) nih direct hriamnaam a bomhnak, asiloah phihkharnak hrial kho dingin Russia bomh an timhnak kan tutiang cu hmu rih lo,” tiah Biden cozah official nih Reuters sinah a chim.
US le a ramdang hawi nih Russia cung i phihkharnak an tuahmi tuar kho dingin Russia bomh a timtu PRC le a dang ram pawl zong biatak tein kan ngiathlai ko hna, tiin officials nih an chim. Direct in Russia raltukmi a thazaang thawnter China nih a duh lo caah, mandeng tein hmu kho a si ko nain, a ram chung zinan thenhnak sehzung le Russia karlak i pehtlaihnak thar tuah a hrial, tiah theih a si. March ah khan a state-run Sinopec Group nih Russia he petrochemical le gas i cawknak kong ceih rih lo dingin an mak.
Kan hnung thla ah khan, Russia nih Ukriane a luhhnawh kongkau ah China nih kan i pehtlailo, a ti caah, cu ti a timi cu ‘tei’ tluk a si, tiah US nih an thlahmi UN palai nih a tangthat ngaingai hna. Russia le Western ram karlak ah zeitindah rualremnak a um khawh lai, tiah Beijing nih thazaang a chuahmi hi Washington caah thilthabik a si kho mi a si, tiah a zummi an tampi. Asinain, nihin tiang ah Russia nih Ukriane a tuahto mi hi China nih sual a phaw lo i, Moscow cung i a tawr le chengin Western nih phihkharnak an tuahmi tu cu a soisel ngai.
Kum thokka tein khan Russia le China karlak chawlehnak a thangcho manh ngaingai i, February ah khan ‘rii um lo” in i pehtlaihnak ngei dingin bia an thanh. Ukraine kongkau ah US nih China hi “lih” in hmualphoh a kan timh, tiah Monday ah khan Washington ah a ummi Chinese Embassy nih cahmai 30 tluk chah newsletter ah a langhter. Cu a chimmi lakah cun Russia nih China bomh a hal, tiin March lio i cathanh an leak kong zong ai tel. Cu bantuk bomhnak cu China nih a pek lo nak kong US officals pawl nih an chim, tiah China Embassy nih a langhter.
March 24 lio i Biden nih phone in Xi a chonh ah khan, China nih Russia nan bomh, tiin a ti lo. Amahbelte, bomh sual ah cun a phichuak tih a nung te lai, ti tu in cun a chimh. Russia hawi a si ruang i a min a chiat lai hi China nih a ruat kho ve ruam lo. Cucaah, China nih Russia a bomhnak kong kan hmuh lo hi a si, tiah kan hnung zarh ah khan Blinken nih Senate Foreign Relations Committee ah a chim. President dirhmun in Biden cu Tokyo le Seoul a vung tlawng lai i, cucu avoikhatnak Asia lei a tlawn a si lai. Asinain China pal ai tim lo. Tokyo i tuah dingmi Quad meeting ah India le Australia hruaitu zong a ton hna lai, ti asi.
Western ram pawl tei duh ah China nih Russia hi hawi ah ai tlaih. Ukraine i Putin a raltuknak hi sungh lei lawng a panh cang caah, Xi nih direct in a bomh sual lai ti kan phang, tiah Biden a bawmtu pawl nih an chim lengmang mi le an tih ngaingai mi asi. Asinain, nihin tiang cu cubantuk cu a um hraw rih lo. Zeitluk tiangin dah ramdang nih Russia an bomh, timi kong hi Washington le a ramdanghawi hna hi donglo in an hlathlai peng, ti asi.
US le EU nih piang ko in China ralrinpeknak an tuahmi hi nihin tiang cu hmual a ngei taktak, tiah German Marshall Fund of US kongah Asia thiamsang a si mi Bonnie Glaser nih a chim. “China nih a ngaih duh lo ah cun, a phichuak hi tih a nung ngaingai lai, tiah fakpiin ralrinnak an pek peng ko rih. Nihin tiangah cun China a cawlcang bak lo. China nih hin bomh rak i tim in a lung vun i thleng than te kho mi zong a si kho mi a si, tiah a chim.
Asinain, Ukraine i Russia tuahsernak China nih sual a phawt duh rih lo mi kong belte ah US officials pawl an lungre a thei peng ngai ko rua. Hihi zoh tikah, Russia nih thawngpang diklo a thanhmi hi i cawn sehlaw a dawh, tiah an chim. Russia nih sual ngaiin raal a tukmi kong le Ukraine nih a ram a rak i ven ve nak kong i ningcanglo in an chimmi vialte hi tu le tu Beijing nih a hlathlai peng ko, tiah Deputy Secretary of State Wendy Sherman nih April 21 ah khan a chim.
Leave a Reply