PUMA Company nih Mitkyina Airport caah Vanlawng Diesel Zuar A Tim Ti Lo

Vanlawng ti a phor mi mawtaw caankel tein a phanh tawn lo ruangah vanlawng Diesel a cat lengmang caah Myitkyina vanlawng tumhmun caah vanlawng Diesel zuar cu kan dinhter cang lai tiah PUMA nih Myitkyina vanlawng Diesel riantuannak zuungah ca a pek tiah theih a si.

PUMA Energy company ca ningah May 26 in vanlawng Diesel kan ngah tiang kan dinhter chung lai ti a si. Singapore PUMA company hi Kawlram vanlawng Diesel zuarnak hi Kawlram Zinan thilchuak Zuarnak (MPPE) he a tuanti mi a si i May 26 ah mah ca hi an pek mi a si.

Ralhrangbu nih rampi uknak an lak hnuah KIA cu vanlawng in voi 100 leng an kah caah PUMA company nih a tu bantuk a tuah mi cungah lunglawmh awk ngai a si tiah KIA lei nih an ti.

“Kanmah KIO zong nih Vanlawng Diesel an pek mi cu dinhter dingin kan rak ti bal cang. Atu harsatnak a um ruangah kan kua kho ti lai lo an ti mi hi a tha, lunglawmhawk ngai a si” tiah KIO chimhnak nawlngei Col. Naw Bu nih Myanmar Now sin ah a chim.

Kachin ram Alaw Bum ralhrangbu umhmun cu KIA nih March thla ah khan an lak caah ralhrangbu nih lakthan timh in raldohnak vanlawng, helicopter he fak ngai in a kah.

Hi kong he pehtlaihin KIA nih “Vanlawng hi bomb thlak hi mipi cungah ningcang lo ralhrang cawlcanghnak a si, mah caah Vanlawng Diesel a phormi mawtaw pawl zong kan kah mi a si” tiah a ti.

Ralhrangbu nih vanlawng Diesel a si lo, Private company pawl nih an phorh mi Diesel pawl an si tiah a thanh ve.

Singapore PUMA company hi 2015 thawkin MPPE he tuanti in National Energy Puma Aviation Services company min in Kawlram chung vanlawng diesel pawl a cawk/zuar mi a si.

PUMA nihhin Kawlram chung vanlawng he ramdang khualtlawnnak airline 22, ramchung airline 10, Vanlawng hlan khawhmi 4, Vanlawng Diesel chawlehnak 6 caah rian atuan piak lio mi a si pinah Yangon vanlawng tumhmun le ramchung vanlawng tumhmun 11 caah riantuannak a ngei lio mi a si.

PUMA nih Vanlawng Diesel pek cu ka dinhter cang lai a ti nain Vanlawng Diesel luhpi le zuar kong ah zeitindah a tuah lai ti cu fiang tein thanh mi cu a ngei lo tiah theih a si.

The Chin Post