Salai Ngun San Aung, Tutan dothlennak ah Laimi nih kan zohthla bikmi Salai Ngun San Aung nih atu lio ngol thei loin Pu Zobawi a thangchiat lengmangmi hmuh tikah lung a tha lo, kan ral taktak kan philh sual maw ti awk in a um. Pu Zobawi zong hi amah ti khawh tawk tein kum 20 leng ralkap cozah a rak doh ve i Chinram NLD hruaitu tiang a phanmi a si. Ralkap nih tutan tlaih in caan sau ngai hrem hmasami zong ah ai tel ve.
Atu belte a kum upa ve cang caah dai tein a um khi a si. Amah tein a um ko mi minung pakhat kha CDF hruaitu pakhat nih khiti a thangchiat lengmang tikah a ngaihchiami an tampi kho. CDF ralkap lila ah siseh, CDF caah biatak tein fund a kawltu lak zong ah Pu Zobawi a tefa an tampi timi philh lo a tha. Zobawi khi CDF nan ral a si bak lo, amah doh caan a si bak lo tiah ka ruah. Nan ral aho dah asi timi philh hram hlah u.
Pu Zobawi hi kum no tein businessman a cang, atu inn asakmi khi amah innhmun a si. Hakha innman a fah biknak hmun ah keimah ka chuah hlan ah inn a rak ngei cang. A tthing tuk cang caah atu a thar in a sak than khi a si. Hluttaw rian a tuan pah in tlorthing, grape dum, mansang thing cinnak dum tibantuk ekah tam taktak a tuah chih. Bungzung pawng ah kung 10,000 leng a cin. Kungkhat ah tingkhat man a si i kum 4 hnu zuar ahcun ting 10,000 leng ka ngah lai tiah media interview ah a rak chim bal.
Zephai zong ah tlorthing tam taktak a cin rih. Culawng hlah, US le Norway ah a fale an um. Hakha ah inn sak cu Laimi tampi nih tuah khawh ciomi khi a si ko. Zobawi a sakmi inn khi sui-inn asi hraw lo. Salai Ngun San Aung, ram caah nai pumpekmi cung ah kan in upat. Kan ral taktak na doh caah kan i lawm. Nain, kan miphun caah tihnung a si lem lomi minung pakhat kha 2015 in tutiang ngol thei loin na dohmi cu kan ngol piak ko cang tiah kan nawl. Salai Lungthli Tum
Na zaam hmanh sile Mizoram ah zaam rih hlah,Tio kap Laikhua ah zaam ko rih Chinram ah kahdohnak a um cang caah heh tiah hmunhimnak kawl in kan zaam hna I atampi cu Mizoram ah an zaam hna I Mizoram cozah le mipi zong nih khual le ralzaam zoh in zoh loin unau tlawn bantuk in an kan don le zohkhenh. Tuhi Thantlang khuapi an zam cuahmah lio a si I Thantlang khua hnarcheu tluk cu hmunhimnak ah an zam cang lai tiah Thantlang um pakhat nih a chim.
Zaamnak kongah hin zaam hlah uh,zaam ulaw tikha iti awk ttha lo mi si,mah duhhtimnak cungah aa hngatmi a si. Kan zam tikah khoika ah kan zaam lai ti ah cun Tio ral va kai theng hau lo,Tio kap khua hnaah um ding si ko,a ruang cu Tio kap ummi khua caah fawite in Mizoram ah eidin va zalh khawh asi ko. Ralhrang hi Tio kap khuaah fawite in an lut lai lo, a ruang cu CNA / CDFs nih an kham kho ngai hna caah si,culo ah Halkha in Thantlang hmanhah fawibai in an lut kho lo,lut ngam ti lo caah Tio kap Lai khua an luh ding cu an I harh ngai lai caah Tio kap Laikhua ahim ngai tikha ka chim duhnak si.
A liamcia kum 30 chungah khan Tio kap khua hna nih harnak fakpi an rak ton kha si,tucu asiti lai lo,a chunglei ka ttial bang khin, Tio kap Lai khua hna tukha an him lai lai I Khuapi le khuapi kar ummi khua hna tu nih tutan kan donthlennak kongah harnak kan ton deuh te lai. Cucaah khuapi a zaam mi hna le khuapi naih ummi khua hna nih zaam kan itimh ko ahcun Mizoram theng va zaam loin Tio kap Laikhua tu hna ah zaam rih usilaw, raltuknak Vanlawng in bomb a kan thlak sual sic un Tio ral ah va zaam ding te a si tiah cattail tu hmuh ning a si. A neitu nawl loin kan ca hi hmundang ah kan tthial piak hlah.
Leave a Reply