Pu Ngun San Aung Thithruainak In Kan Chin Ram Ah Thimnak An Tuah Lai Timi Thawngpang Cu!!

Chin Ramkulh Ah SAC Nih Election Tuahnak Ding Ah Timhtuahnak An Ngei!
==============================
Chin ramkulh ah SAC ralkap nih Thimnak(Election) tuahnak ding ah timhtuahnak an ngei i, khuapi chung lah-wah-kah(လ.ဝ.က) le General Administration Department-GAD zung rianṭuantu hna nih chungkhar cazin chekhlatnak an tuah, tiah theih a si. Chin ramkulh, ramkulh cozah zung rianṭuantu pakhat nih, “Phu 15 hrawng i ṭhen in cazin laaknak tuah a si i, lah-wah-kah nih cazin an laakmi le ID card he chek chih a si.

Pengkulh dihlak ah chungkhar cazin laak a si lai, i timhtuahnak caan cu thlakhat a si ti in kan theih,” tiah a chim.
Atu tiang theih khawh tawk ah chungkhar cazin an cheknak khua hna cu Hakha, Falam le Matupi hna an si. Mindat le Kanpalet ah cun khuate lei ah ralzaam dirhmun in a ummi hna cu khuapi lei kai ding in SAC ralkap nih an hnek chih hna, tiah theih a si.

Zatlang Uknak Rian A Ṭhanchoh Khawh Nak Ding Ah Mara Peng Khuabawi Hna Bawmhnak Phaisa Pek An Si Lai, Chin ramkulh Mara ram zatlang uknak rian a ṭhanchoh khawh nak ding ah khuabawi hna cu July thlathok in bawmhnak phaisa pek an si lai, tiah Mara Administrative Teritorial Council(MATC) nih cathanh a chuah.

A voikhatnak Mara mizapi khawmpi kum 2022, MATC zatlang ukhruainak ah cun cuhlan nakin Mara ram ṭhangcho deuh seh, ti hmuitinhnak he pengkomh 6, khua 64 ah khuabawi vialte cu July 30 thok in December 30 tiang thla 6 chung zung i a herh mi le a dang a herh mi paohpaoh ca ah thlakhat ah Rupees 1500(MMK-50000) bawmhnak pek an si lai, tiah MATC nih an thanh.

Mara ram timi cu Chin ramkulh Thantlang, Matupi le Paletwa peng 3 chung ah Mara miphun hna umnak khua pawl chim duhnak a si i khua 64 a um, tiah theih a si. Atu ahhin Mara ramchung i khua 50 leng cu middle school tiang an ngei kho cang, tiah theih a si. “Khua 64 chung ah khua 52 cu middle school tiang hon khawh a si cang i siangngakchia 3,000 leng an um. CDMer cachimtu 50 le volunteer 150 an um,” tiah MATC in ṭuanvo ngeitu pakhat nih a chim.

Mara ram chung ah cachimtu CDMer pawl cu thlakhat ah kyats-100,000 an pek hna i, volunteer pawl cu kyats-70,000 cio an pek hna, tiah theih a si. A voi 2 nak Mara mizapi khawmpi cu kum 2023 ah tuah an i tim i, Mara miphun a aiawhtu le a sang bik nawlngeihnak hmun a si, tiah an cathanh ah an langhter.

SAC Nih Insein Thonginn Ah Ramkhel Lei Thongtla Thih-dan An Pekmi 3 Cu An Thah Ṭhan Hna!: Insein thonginn thongbawi hna nih ramkhel lei thongtla thih-dan an pekmi 3 cu an thah ṭhan hna, tiah thong a rak tla bal mi U Htun Kyi nih Delta News Agency ah a chim. “Atu ahhin thih-dan pekmi ramkhel lei thongtla za renglo an um i, hmailei ah minung zeizat dah atu bantuk in thah an si ṭhan lai theih a si rih lo. Thong chung ummi hna sin in thawngpang hlatnak kan tuah i, minung 3 an thah ṭhan hna, tiah kan theih,” ti in ramkhel ruangah thong a rak tla bal mi U Htun Kyi nih cun a chim.

July 23, ah U Jimmy, U Phyo Zayar Thaw, Ko Hlah Myo Aung le Ko Aung Thura Zaw hna cu thonginn nawlngeitu hna nih an thah hna hnu ah, ramkhel lei thongtla thih-dan pekmi minung 3 cu an thah ṭhan hna, tiah a chim chap.

Atu bantuk in ramkhel lei thong tla hna cung ah thih-dan pek in an thah hna ruangah July 25 ahkhan hmunkip um thong tla hna nih duhlonak an langhter i, thonginn nawlngeitu hna nih an tukvelh hna i, an hrem hna caah cheukhat thongtla hna cu faak ngai in hliamhma an tuar, tiah U Htun Kyi nih cun a chim. AAPP nih cazin an langhter ning ah thong tla mi hna chung in thih-dan pekmi dihlak cu minung 113 an si, tiah an langhter.

Sagaing Ramṭhen Chaung U Ah Bomb Puahnak In SAC Ralkap 22 An Thi!: Sagaing ramṭhen Northwest Headquarters in Myinmu lei ah kal mi SAC ralkap mawṭaw hna cu Chaung U peng, Nga Yan(ငါးယှန်) khua nichuah lei an phak ah tualchung PDF nih bomb an puahhnawh hna i SAC ralkap 22 an thih lengah hliam tuar zong an um, tiah theih a si.

Cu bomb puahnak cu nizaan zing Sml 11 hrawng ah Farmer Revolution Force (Chaung U) le Myaung Revolution Army battallion 5 i bawm in an tuah mi a si, tiah FRF CHU in ṭuanvo ngeitu nih a chim.

“SAC ralkap hna cu an camp in mawṭaw 22 he an ra i Chaung U certual ah mi an i thleng. Cu mawṭaw 16 in ralkap 50 hrawng cu an ra i bomb lung 2 in kan puah hna,” tiah FRF CHU in ṭuanvo ngeitu pakhat nih a chim. SAC ralkap lei nih hriamngan in ruahdamh in an kah ve hna, tiah theih a si.

Bomb a puah mi mawṭaw cu a rawk i, a thi mi ralkap ruak hna cu an hawile nih an kalpi hna, tiah theih a si. SAC ralkap bomb an puah an tonnak cu Monywa-Mandalay highway ah a si i SAC ralkap nih ralkap thazaang chapnak lam ah an hman bik mi lam a si, tiah theih a si.

Hrithlai in minung pa 4 thah an si hnu ah SAC ralhrang uktu he tuahkel ningin chawhlehnak kan tuah ti lai lo tiah American ramdang vuanci nih July ni 25 ah a chim. Myanmar tatmadaw uknak cu fak piin dan peek ding ah le a dang timlamhnak pawl zong i ruah a si i duh thimawk zong kan cabuai cungah timhcia tein an um dih cang ti zongin a chim.

Kawlram chungah raltuknak thilri pawl zuarnak cu kham ding ah le ram pumpi nih zumhnak in zeibantuk hlannak (phung ning loin thilzuar, sahrang riantuannak tibantuk, etc,) paohpoah cu dan pekin hrial dingah vawlei ram pumpi sinah American ramdang vaunci in chimnawl negitu Ned Price nih thawngzamh thianhtlimhnak ah a chim.

A hlan i Biden nih phihlkhamhnak a tuah mi ah a tang mi zinan lei cu biden nih phihkhamnak tuah dingah timhlamhnak a ngei maw tiah bia hal nak an tuah tikah Ned Price nih,” a dang timlamhnak pawl zong i ruah a si bantukin duh thimawk zong kan cabuai cungah timhcia tein an um dih cang.” tiah lehnak a tuah hna.

” Tih a nung tuk mi le tasapur in an thil tuah mi cung ah mah uknak tangah rian a tuan mi he tuahkel ningin chawlehnak tuah a ngah ti lo.Kan tuahti kho ti lai lo ” ti zongin a chim chap. Tukum Jan: thla ah a thli tein hlethlainak an tuah mi ah thihdan peek mi minung pa 4 hna cu SAC ralhrang cungah dohralnak an tuah bangin Pau dohthlennak ah i bom in an i tel tiah tazacuai an si tiah an chim.

Relchap, Pyosawṭhi Umnak Tat Kone Khua Cu PDF Phufonh Nih An Luhhnawh I Pyosawṭhi 7 An Thi: Magwe ramṭhen Pauk peng, pyosawthi pawl umhmun khuarnak Tat Kone(တပ်ကုန်း) khua cu ‘Zeyar Thaw’ operation min in tualchung PDF phufonh nih nihin July 26 ah an kah hna i, pyosawṭhi 7 an thih lengah midang zeimawzat hliam an tuar, tiah Young Revolution Front-YRF nih an thanh.

Kahdohnak cu tuzing Sml 5 in 7 tiang a rau i SAC ralkap le pyosawṭhi meithal zuun khat, Uzi kuan 24, G3 kuan 3, 5.56 kuan 69, kah-pah-sah(ကပစ) kuan 29 le kut cheh bomb pakhat cu PDF nih an laak, tiah theih a si.

Pyosawṭhi le SAC ralkap umhmun an kuarnak Tat kone khua hi Southern Pauk Guerillas Force(SPGF), YDF Saw battallion 9 & 10, Yenangyaung PDF battallion 721, PPC, Pauk PDF battallion 4 & 6, CAF-SPU PDF le Young Revolution Front-YRF hna i bawm in an kah hna. PDF phufonh lei cu hliam tuar um loin hnu an tolh ṭhan, tiah theih a si.

Relchap, Magwe Ramṭhen Pauk Peng Ah SAC Ralkap Nih Ngakchia 4 Le Upa 3 An Thah Hna! Magwe Ramṭhen Pauk Peng Ah SAC Ralkap Nih Ngakchia 4 Le Upa 3 An Thah Hna!: Nihin July 26, zinglei ah Magwe ramṭhen, Pakokko pengkomh, Pauk peng, Tat Kone(တပ်ကုန်း) khua ah kahdohnak a chuak i SAC ralkap nih khuachung inn cheukhat cu an khangh. Inn kaangmi a ciamh hnu ah ngakchia 4 ruak kan hmuh, tiah Pauk peng mi bawmchantu chungtel nih an chim.

“Kum 10 tang ngakchia 4 cu mei in an khangh chih hna. Kum 30 hrawng nu pakhat le pa 2 cu kuan hliamhnak in an nunnak a liam,” tiah tualchung mibawmchantu pakhat nih a chim. Meithal kah in nunnak a liammi pa 2 cu tualchung hriamtlai phu chungtel an si i, nu pakhat cu mi sawhsawh a si, tiah tualchung mi nih a chimchap.

“Nihin July 26, zinglei suimilam 6:00 hrawng ahkhan khuachung cu SAC ralkap 500 hrawng nih an kulh i, cu hnu ah tualchung hriamtlai phu hna he an i kap. Tualchung hriamtlai phu lei in ralkap 2 nunnak liam i, meithal 1, kut cheh bomb lung khat le kuan zun 94 hrawng a tlau,” tiah Tat Kone(တပ်ကုန်း) tualchung hriamtlai phu he naihniam in ummi pakhat nih a chim.

Relchap,(Photo Dang) Chin ramkulh Khualipi Hakha ah bomb puah thawng pehtlai in a thang! Hakha ummi pakhat nih, “Nihin July 26 zanlei sml 4:30 hrawng in bomb puah thawng a thang cang. Thantlang lam lei in a puakmi a lo ko. Atu zanlei sml 5:00 in minutes 22 tiang hrim cu meithal thawng le bomb thawng pehtlai in a thang,” tiah The Chin Post ah a chim.

SAC Ralkap Nih Hniarlawn Khua Inn 67 An Bauh, Chin ramkulh, Hakha peng Hniarlawn khua hlun cu SAC ralkap nih nizan July 25 ah inn 67 an bauh tiah kan theih. Hniarlawn khuami min langhter a duh lomi pakhat nih,”kan khua cu ralkap nih an kulh dih. Cu hnu ah khuachung ah an lut. Block 1 sang dah ti lo cu an bauh dih ngawt ko. A dihlak an bauhmi hi inn 67 a si,” tiah The Chin Post ah a chim.

“Kan inn zong an bauh ve i, tangka sing 2 leng le phone thar te an fir. Cheukhat inn ahcun a tlawm bik sing 10 hna an fir, cheukhat inn ah sing 1 le cheu tibantuk an fir hna. Cu chungah Khrihfabu tang zong aa tel. Dawrthil tam ngai, Angki, tawhrolh, Ar le kawngthun(Namte a nganmi ) tiang in an fir dih. An firmi dihlak tuak ahcun a tam tuk, an firmi zat cu kan tuak kho rih lo,” tiah a chimchap.

SAC ralkap nih nizan July 25 ah Hniarlawn khuami Salai Mang Lian Sang cu tualleng ngakchia a zam kho lomi an um sual lai, tiah va chanh ding in khua chung a luh lioah SAC ralkap nih an kah thah. Anih hi aw le zai a ṭha tukmi a si pinah khuami nih an bochan tukmi a si. A ruak cu nihin July 26 sml 10:30 hrawng ah an vui tiah kan theih.

Monyua Ah SAC Ralkap Nih Kum 8 Asi Mi Ngakchia Nu An Kah Thah, Monyua ah nizan July zanlei ah SAC ralkap mawtawrun am kiang dir in a kiantu mawtaw cu SAC ralkap nih a ruang um lo in an kah caah mawtaw chung um mi Kum 8 ngakchia nu pakhat a nunnak a liam i pa pakhat hliam a tuar.

Nizan July 25 zanlei Sml 6: 30 hrawngah Monyua – Mandalay lampi cung Tar zohkhenhnak pawng ah SAC ralkap mawtaw 11 hrawng cu an ra Light Truck pakhat nih lam kiang ah dir in mawtaw thlalang a on bu in a kianh hna, mawtaw chung ah ngakchia a tel cu fiang tein an hmuh ko bu in SAC ralkap hna nih meithal in an kah hi a si tiah khuami hna sin in theih a si. Kuan nih a khen mi ngakchia nu cu Monywa siizung ah an kalpi lio ah a nunnak liam tiah theih a si. ” Ngakchia nu te cu a mit ah an khen tiah khuami hna sin in theih a si.

KyaukGyi Ah KNLA Le SAC Ralkap An I Kap, SAC Ralkap 5 An Thi , KNU Brigade -5 hmunhma KhaLayLoiThu ( ခလယ်လွီထူ) pengkomh ,LayDu ( KyaukGyi)( လယ်ဒို ( ကျောက်ကြီး) peng ah July 22 ah SAC ralkap le KNLA Brigade 5 kuttang Battalion 9 karlak ah kahdohnak a chuak ralkap 5 an thi i 10 hliam an tuar tiah cathanh chung ah an langhter.

KNLA Battalion 9 lei in a hliammi um lo tein hnu an tolh kho tiah KNU nih a langhter chih. July 24 zong ah khan LayDu peng, DaLahSeik( ဒလဆိပ်) khuakomh InPaRihKo DuSeik ( အင်းပရိကူးတို့ဆိပ်) ah SAC ralkap nih an phum mi bomb cu tualchung mi pakhat nih ai lamh sual caah NgiangLayPin ( ညောင်လေးပင်) Siizung ah ai thlop lio a si tiah KNU nih an langhter chih.

Shwebo Peng Kahdohnak Ah SAC Ralakp 3 An Thi, Mizapi Vengtu Ralkap 3 An Nunnak A Liam, Sagaing ramțhen, Shwebo peng, YePhyoKone( ဇီးဖြူကုန်း) khua ah umhmun khuarmi SAC ralkap le tualchung PDF hna karlak kahdohnak a chuak i SAC ralkap 3 an thi i PDF 3 an nunnak liam ve tiah theih asi. July 24 zinglei Sml 9:15 hrawngah Shwebo peng , YePhyoKone (ဇီးဖြူကုန်း)khua ah umhmun a khuarmi SAC ralkap le PhyoSawHtee hna cu mizapi vengtu ralkap hna nih kan va kah hna i SAC ralkap 3 an thi, 5 hliamfak an tuar tiah SNAKE EYES PDF phu nih cathanh chung ah an langhter.

A thimi SAC ralkap 3 ruak cu mizaw phorhnak mawtaw in an phorh hna. Cu lio ah TayTiDaw ( တည်သီးတော)၊ TiLung (သီးလုံး)၊MinChin(မြင်းခြင်း) khua hna in PyoSawHtee hna bawmh ding an ra i hnu kan tolh lio ah kan ralkap 3 an nunnak a liam tiah Shwebo Federal Army( S.B.F.A) nih an langhter.

Cu kahdohnak cu Teihnay( 2) Pah. Kah.Phah(တိုက်နယ်(၂) ပ.က.ဖ), C&T SHWEBO (LDF)၊ Snake Eyes (LPDF)၊ ShweBo Federal Army (S.B.F.A)၊ DaungMan(ဒေါင်းမာန်)-SHWEBO (LDF)၊ Alpha-7 (LDF)၊Bu KyuaZaan ( ဗိုလ်ကျားရိုင်း ရွှေဘို)(LDF)၊ Shwebo SunYe(ရွှေဘို စွန်ရဲ)(LDF)၊ MDF-SHWEBO၊ Mah 1000 – Depezin (မတစ်ထောင်(တစ်ကောင်ဖွား)-ဒီပဲယင်း)၊ Yamani Daung – Depezin (ဇာမဏီဒေါင်း(ဒီပဲယင်း))၊Kyua Yan ( ကျားရိုင်း(ဇေယျာသွေး) ) phu hna an i bawm. A nunnak a liammi PDF ralkap hna cu Kum 22 in 24 kar mino an si hna tiah SNAKE EYES PDF nih an langhter.

Mobye Ah SAC Ralkap Motor Kah An Ton Caah Ralkap 15 Hrawng An Thi, Shan ramkulh, tlanglei Mobye(မိုးဗွဲ) khua ah SAC ralkap motor cu PDF ṭangṭi phu hna nih kan kah caah a thimi le aa hliammi an tam, tiah Mobye PDF ṭuanvo ngeitu nih a chim. July 25 zanlei sml 5:00 hrawng ah kahdohnak a chuak i, suimilam 3 chung an i kap. Mobye PDF BO-1၊ BO-2၊ Loikaw PDF၊ URF ṭangṭi phu nih an kah hna, tiah theih a si.

Naypyidaw Pawnglong lei in motor 21 le ralkap thazaang 300 hrawng nih rallam an sial i, bomb in kan puahhnawh ko nain an tam tuk caah sau ngai kahdohnak a chuak, tiah Mobye PDF ṭuanvo ngeitu nih a chim. “Zinglei ah hmunhma humhimnak kan tuah i thi le hnai cu aa dil liangluang ko. Kan hmanhmi bomb nih ralkap phukhat a puah hna caah thi le hnai a tam hi a si lai. Kan i kap lio zong ah ralkap 3 an thi,” tiah a chimchap.

Cu kahdohnak ah PDF ralkap 1 a phei ah meithal kuan nih a khen. SAC ralkap lei in 15 hrawng an thi, tiah Mobye PDF ṭuanvo ngeitu nih a chim. SAC ralkap nih hriamngan kahpiak ding in bawmh an hal hna nain PDF nih an hmanhmi bomb pawngkam an phak caah tam ngai an thi. Hmailei kal ngam ti lo in lam dang in hnu ah an kir, tiah theih a si. SAC ralkap nih hriamngan an kah caah ralzam an umnak phungki sianginn cungah a tla i, tualchung mi 1 a nunnak liam, 1 hliamhma a pu tiah Mobye PDF ṭuanvo ngeitu nih a chim.

Ko Jimmy Le Ko Phyo Yeza Thaw Tel In Minung 4 Thihdan Pek Nak Kong Ah Interim Chin National Consultative Council Nih Cathanh Chuah, Ko Jimmy le Ko Phyo Zeya Thaw tel in minung 4 hna SAC ralkap nih an thah mi hna cu ” Interim Chin National Consultative Council” ( ICNCC) nih fakpi in sual kan phawt hna.

Hi an tuahser nak hi hramhram uknak cu doh in Democracy uknak a duh tu mizapi i an duhnak i hmuh ter lo , tuah piak timh lo leng ah SAC ralkap nih ramchung ah a cang mi ramkhel kong a phunphun cu ningcang tein tawlrel an i tim lo i a fak bik hramhram in hremnak le thahnawnnak in tawlrel an i timhnak an langhter nak a si tiah July 25 ah cathanh an chuah.

” SAC thil tuah mi cu ICNCC nih fak pi in sual kan phawt hna. A tu bantuk thil an tuah mi nih hin kanmah Chin miphun tel in Kawl ram mizapi hna thinlung ah SAC cungah duhlonak le dohnak lungthin a chuahter chin khawh i kan ram buainak a zual chin nak a si ” tiah Interim Chin National Consultative Council nih cathanh chungah an langhter.

Ko Jimmy, U Phyo zeya Thaw, U Hla Myo Aung, U Aung Thura Zaw hna 4 cu phungning tein sualphawt nak in kan thah cang hna tiah SAC media a si mi Myanmar A Lin le KyeMone thawngzamh nih nizan July 25 ah an langhter. SAC ralkap nih hi hna 4 hna hi zeitik ni ah an thah hna ti zong fiang tein an chim lo pin ah a thi mi hna an ruak le an ruhro zong chungkhar hna sin ah an pe lo.

Hi bantuk thihdan pek i thahnak kong ah Interim Chin National Consultative Council zong kan lautuk i a bik in an mah he a pehtlai mi hna le tantak mi chungkhar nu le pa hna nan ngeihchiat nak knn i hrawm tiah ICNCC nih an langhter. U Jimmy, U Phyo Yeza Kyaw Thaw, U Hla Myo Aung, U Aung Thura Zaw hna tel in dothlennak chungah nunnak a pe mi nan dihlak upatnak sangbik kan in pek hna ” tiah Interim Chin National Consultative Council nih cathanh an chuah.

Be the first to comment

Leave a Reply

Your email address will not be published.


*