PPST nih ralhrang nih 2020 thimnak a hrawh mi nih Democracy lam a donh tiah an thanh

PPST nih ralhrang nih 2020 thimnak a hrawh mi nih Democracy lam a donh tiah an thanh August 4 in 5 tiang tuahmi NCA minthu tlangcung hriamtlaibu 10 nih ser mi Peace Process Steering Team (PPST) meeting nih ralhrang nih 2020 rampi thimnak result a hrawhmi cu Democracy hnutolh ter tu le ramkhel kong ceihnak a donhter tu a si tiah an thanh.

PPST cathanh nih Kawlram buainak kong he pehtlaih in ASEAN hnatlaknak 5 a kalpi tu dingin ASEAN palai caah Brunai ramdang vuanci- 2 an thimmi cungah lunglawmhnak kan ngei.PPST zong nih vawlei cung ram hna nih Kawlram kong an tawlrelnak ah kan ram sining he a tlak tein kalpi khawh a si nak dingah kan i zuam lai.

Covid-19 dohnak kongah a herh mi thilri, sii hna cu ramchung mipi vialte caah ramdang bawmhnak kan ngah khawhnak ding le mipi sin ah rianrangin a phanh khawhnak dingah ramri tan le a lamkip in luhpi khawhnak dingah kan i zuam lai tiah cathanh nih a langhter.

A voi 18 nak PPST meeting hi PPST hruaitu Naing Aung Min aiawh in biachimtu Col. Khun Ok Ka nih tlangcung hriamtlai phu nih kum 70 reng lo kan dohthlennak ah thisen luang in siseh, thisen luanglo in siseh, dohthlennak saupi kan rak tuah cang.

Atu kan ram hi a thenthek cang, mibu zong a rawk dih cang.Chiatnak phun 3 pin ah ral phun 5 cu mipi vialte nih voikhat pi ah kan ton.

Kan ram nih chihkhat te ah zalonnak a hmuh chung, kum 10 chungah mipi nih an rak hmuh mi zalonnak, fiannak le nuhrin covo hna mino nih a thar in an sungh than caah an inpuannak le an tuar khawh lo nak ruangah ralhrangbu an doh mi cungah PPST nih theihthiamnak tampi kan ngei.

A bikin Kawlram laifang, hmunpi lei ah a ummi mipi hna cawlcanghnak fiang ngaiin ka hmuh khawh caah ka lunghmuih ngai.

Ramkhel thazaang,ralkap thazaang le ramkhel le ralkap thazaang a fonhmi zeibantuk thazang a ngei mi phu an si zongah mipi duhnak/lungthin a tel lo ahcun teinak an hmu lai lo tiah a chim.

The Chin Post