NCA ah hnatlaknak min a thumi tlangcung hriamtlaibu 10 hna nih dirhmi Peace Process Steering Team nih ralhrang khawngsil he biaruah an i timhnak biathli a puang tiah theih a si.
Cu biathli cu PPST nih May 28 ah ralhrang khawngsil nih a sermi remdaihnak tuahtu bu hotu Bochohci Ya Pyih sinah an tialmi a si. NCA kongkau ti a si.
Ralhrang khawngsil remdaihnak tuahtu bu hotu aiawh in Bochohci Min Nawng nih minthut in May 19 ah a kan kuatmi ca kan hmuh, SAC nih NCA hnatlaknak kan cohlan lai nan ti caah kan i lawm, tiin bia an thok.
An ca chungah cun atu lio a cang cuahmahmi ramchung buainak hi SAC ca zongah siseh, tlangcung hriamtlaibu hna caah siseh, ramkhel party le mip ca zongah siseh, aho ca hmanh ah hlawknak a um lonak le ramkhel boaruak a daih deuh poah ah a that chinchin nak kong an tial.
Myanmar buainak ruangah ram cheukhat nih timhmi ngei tein an i thlakmi an duhlonak le an i thlakmi khamnak dingah cun kanmah he kutlaih in a tuan khotu ding rammi hna kha zulhphung le rikhiahmi chungin sawmnak tuah i tuanti kha a tha bikmi a si tiah PPST nih an ruahnak an tialchih fawn.
Cu ruangah SAC le PPST cu a rannak in i ton i biaruahnak ngeih ding le PPST nih cathanh chuah an i timhnak kong zong an ca chungah cun an tial.
Hi ca hi mipi nih tuahmi Spring Revolution zeirello, hnuchit a si tiah min chim a duh lomi tlangcung hriamtlaibu hruaitu pakhat nih a chim.
Hi ca hi zeibantuk bu le aho hruainak in tial a si ti an langhter lo i PPST ah aa telmi hriamtlaibu 10, an dihlak lungtlin in an tialmi maw a si ti zong theih a si rih lo.
The Chin Post
Leave a Reply