NUG Nih Ralhrang Duh Poh Cawlcang Kho Loin A Tuah Ko Cang Hna

Chindwin tiva chungah phungninglo in phorhmi lunghring hna cu PDF nih an tlaih i, NUG cozah sinah an pekchanh tiah Minkin mizapi vengtu battalion 1 nih cathanh an chuah. Minkin mizapi vengtu ralkap phu hna nih cuka tiva zohfelnak an tuah i a luancia ni tlawmpal ah phungninglo in phorhmi lunghring telhin tilawng 11 cu bomb puahhnawh in an doh tiah theih a si.

Chindwin tiva cu hmang in phungninglo thilri phorhnak, pyusawthi phu, dalanBle ralhrang phu hna caah an herhmi riahcaw, hriamthil hna phorhnak ah cu tilam cu hmang in hmunhma thianhnak an tuah caah PDF nih a tu bantuk in tilei ah zohfelnak Rian an tuannak hi a si. PDF hna nih phungninglo phorhmi lunghring hna cu tlaih in NUG rianngeitu sinah pehtlaih in an pekchanhkhawh.

Minkin mizapi vengtu battalion 1 phu hna nih tilam lei riantuannak cu pehtlai in an tuah i phungninglo thing phorhnak, (ကျောက် မီးသွေး), lunghring telhin ralhrang hna he pehtlaimi thilri phorhnak hna cu hrawhpiak an si cun, lunghring tlaihmi cu NUG sinah pekchanhnak an tuah tiah theih a si.Khit Thit Media

Mizoram ah a linsa ngai mi, phung ning lo in Myanmar lei in kuva thei an luhpi i, Champhai DC Pi Maria CT Zuali nih a tlaihpiak hna kongkau ah Party le zatlang bu tampi nih aw-aan an ngei. Nizan December 22 ah khan Mizoram media ngan pakhat zonet nih Pi Maria CT Zuali biahalnak an tuah.

Pi Maria nih phungning lo in a lutmi kuva thei a tlaih kong ah FIR kalpi a si mi cu cunglei bawi he pehtlaihnak an ngeih a zumh kong a chim. Champhai DC Pi Maria CT Zuali Nih cun, “Mizoram i District pakhat bawi bik ka si ve caah ka riantuan ning dohkalh in FIR an pek hi a lung a fak pah ko,

Khualrang ngaiin palik nih FIR an kalpi caah ka lungthli te cun kaa lawm lo, sinain ka tuanpi hawi hna nawlngaihnak pin lei a si caah tampi leh ka duh hna lo,” tiah a chim. “Myanmar lei in kuva thei a lut mi a tlai ruangah chawlet pawl hi ka hua hlei hna lo. District pakhat Magistrate ka si caah ka rian ka tuan a si ve ko, hi buainak kongkau ah hin Mizoram cozah MNF ministry zong ka doh hlei lo, ka rian he pehtlai in ka tuan mi a si,” tiah Pi Maria nih cun a chim chap.

Phung ning lo kuva thei a lut mi donghter ding Mizoram chief minister le India Prime Minister Narendra Modi sin i memorandum a rak tialtu Environment and Social activist Pi Vanramchuangi nih cun hi kuva thei kongkau ah hin cunglei bawi an i tel ve a zumh kong a chim. “India phung hrampi zoh ah kuva thei hi myanmar lei in a lut kho ding a si lo nain India le Myanmar pehtlainak lampi hrawng in motor tampi nih kuva theih an phurh khawh i,

Cozah in tuanvo a ngeitu palik duty nih an tlaih duh hna lo caah a thlithup in a tawlreltu cu an um tengteng ko,” tiah Pi Vanramchhuangi nih cun a chim. Hi lio ah hin Mizoram district dangdang hna zong nih Pi Maria dirkamhnak ah Myanmar lei in an District chung ah kuva thei luhpi sianhlonak phungphai an ser ve.

Khawzawl DC CC Lalchuagkima nih cun nizan December 22 ah khan Khawzawl District chung ah Kuva thei luhpi le phurh sianhlonak cathanh a chuah, an cathanh nih thlahnih chung a nguh lai. Hi hlan deuh zong ah Saitual DC zong nih kuva thei luhpi sianlonak cathanh a rak chuah cang.

 

Be the first to comment

Leave a Reply

Your email address will not be published.


*