Ram le Miphun zalennak, a dik mi Zauk phung le Federal Democracy caah nunnak thap in hriam a tlai mi PDF pasaltha minung (4) nih an nunnak an pek than. Demoso pengkulh chung raldohnak ah KNDF (Karenni Nationalities Defense Force) minung (4) nih ram le miphun caah nunnak an pek than hi asi.
November 25, 2021 chun raldohnak ah hi pasaltha minung (4) hna nih an nunnak an pek hi a si i nizaan November 26, 2021 ah khan sunglawi tein an ruak vuinak le thlahnak, a donghnak bik upat peknak cu Karenni Nationalities Defense Force(KNDF) hmun chung ah an tuah piak hna hi a si. “Hramhram ralhrang uknak a cimih nak ding,
Ram mipi duhmi uknak a chuah khawhnak ding le Federal rampi ser khawhnak ding caah tiah nunnak le thisen thap in hmaisuang raldoh tu pasaltha minung (4) hna upatnak kan pek hna, an tuan lio mi an lo hmaban, a dih rih lomi dothlennak ah nan hnu kan zulh lai i teinak kan hmuh tiang kan tuan lai” tiah upat peknak zong an tuah hna hi asi. Rampi raldohnak cu daih lei a panh kho rih lo.
Min Aung Hlaing le a ralkap pawl cu kan sung ti an theih ko nain mipi sin ah uknak pek an i tim rih lo. An hram in bongh lawlaw lo ahcun ralhrang cawlcanghnak hi a dih kho ding a si rih lo. Cu caah miphun pasaltha zeizat nihdah nunnak an pek rih hnga timi ruah ah lung a nuam hrim lo. Kan Pathian nih kan ram damter hram cang seh. Thlaza cam cio hna usih.
WHO nih cun coronavirus phundang an hmuh thar than, amin ah Omicron tiah an sak. Omicron hi coronavirus chuak hmasa nakin a let tampi in aa thleng cang i, midang he i chawnh zong a fawi deuh, tiah WHO nih a chim. Coronavirus chuak thar ‘Omicron’ hi November 24 ah, South Africa ram ah an hmuh tiah, WHO nih a thanh.
Hi coronavirus chuak thar ‘Omicron’ hi South Africa lawng si loin Europe le Asia zong ah hmuh a si cang. Botswana, Hongkong, Belgiam le Israel hna zong ah an hmuh, tiah BBC nih a tial. Omicron a chuak, tiah thawng a than sin in vawleicung ram tampi nih Africa ram hna lakin an ram an khaar colh.
UK nih cun Africa ram cheukhat, South Africa, Botswana, Namibia, Zimbabwe, Lesotho le Estwatini hna in British mi an si lo ahcun luh an siang rih lo. Hilio ah US cozah zong nih Africa ram cheukhat, South Africa, Botswana, Namibia, Zimbabwe Lesotho, Estwatini, Malawi,
Mozambique ram hna zong in, cawn nikhat ni thok in US ah luh khawh a si ti lai lo, tiah an thanh ve. Coronavirus phundang in aa sermi Omicron hi vaccine nih a kham kho lai maw kham kho lai lo, aa fiang rih lo, tiah ngandamnak lei thiamsang hna nih an chim.
Leave a Reply