Pep Guardiola Nih Ma Ti Bak Hin Dias A Van Thangthat

Manchester City manager Pep Guardiola nih cun an defender Ruben Dias cu a thangthat ngai, Dias an cawk khawh mi cu vantha a ti bak.

Kan theih cio bantuk in tu tan transfer window a on mi ah khan Portuguese defender kum 23 i upa mi Dias hi Portuguese club Benfica in man fak ngaiin an cawk. an cawknak man ah hin 65 million hrawng an liam ve. Dias hi City nih an i bochan ngai mi pakhat a si lio.

Guardiola nih Dias kong chim in, “Player kan cawk hrimhrim ah hin team caah a herh ding le tha ding ka cawk tawn, cu bantuk cu kan ruahchan mi a si, asinain zei bantuk in dah team caah an that lai ti cu theih colh khawh a si lo.

“Ruben hi a thiamnak le football a theihnak hi a tha bak, a thiam lonak cawn a duh peng mi a si, a taksa le a lungput nih hin kan dihlak in a kan lawmhter. ni fatin in gym ah hin a kal tuan peng, amah hrimhrim hi a uluk ngai tiah Guardiola nih a chim.

‘Kum 23 lawng i upa a si rih i, kum tampi um rih ding mi ah player herh taktak ding mi kan lak ti hi ka fiang ngai tiah Pep nih a chim.