Sagaing ramthen Kawlin peng ah Oct 27, nizan zinglei 2:00 am ah ralhrang 100 hrawng cu mip vengtu ralkap nih hmunhnih in an kah hna caah ralhrang 40 hrawng an thi tiah NUG Runvennak Vuanci nih Oct 28, tuzing ah thanhnak a tuah. Sagaing ramthen, Kawlin peng nichuahlei Kyaukpintha khua le Kachin Gone ,.
khua karlak i hmunhma a lami ralhrang 20 hrawng le an hnuah aa din liomi ralhrang 80 hrawng cu Kawlin PDF nih caan khat ah hriamngan in an kah hna i ralhrang 40 hrawng an thi, Kawlin PDF lei pakhat tlawmpal hliam a tuar tiah theih a si. A thimi ralhrang hna ruak cu mei in kan khangh hna tiah Kawlin PDF nih cathanh an chuah.
ASEAN Democracy Dirkamh Dingin President Biden Nih Bia A Kamh Hna: Myanmar ah democracy a nun than khawhnak ding, ASEAN ram chungah democracy, nuhrin covo le zalong tein rili cung umkal khawhnak a um nak dingah kan i zuam lai tiin US President Joe Biden nih ASEAN Summit ah a chim.
Cu lawng si loin Myanmar ah ralhrangbu nih nawlngeihnak an lak ruangah lungthin a fak, cun ASEAN ramchung daihnak zong a hnorsuan fawn caah a rannak in tuahremhnak lam kawl a hau ti zong President Biden nih US-ASEAN Virtual Summit ah a chim fawn. US Cozah cu Myanmar mipi hna lei ah an dirnak kong, ralhrangbu nih thatlonak an tuahmi violate ngol ding,
Ramlhel thonghtla vialte thlah dih ding le democracy lam zulh than dingin President Biden nih cun ASEAN meeting halnak a tuah tiah theih a si. Meeting ah ralhrangbu hruaitu Min Aung Hlaing an sawm lomi kongah President Biden nih ASEAN upa hna sinah thangthatnak le lawmhnak bia a chim. A voi 39 nak ASEAN Summit cu nihnih chung (Oct 26 le 27) an tuah cang i Oct 28, tuni cu a donghnak a si lai. Ref: VOA
Leave a Reply