Kachin ram lei ah a kal mi ralhraang motor pawl bomb an puah hna ca ah 30 hrawng an thi October 31, 2021 October 30 ah Kachin ram lei i ah rak kai mi ralhraang motor phu cu Bomb puah an tong i ralhraang 30 hrawng an thi tiah tualchung mi nih an chim.
Zaanlei suimilaam 3:00 hrawng ah Sagaing ramthen lei in Kachin ram lei ah riahcaw le ralhraang thazaang chapding in a ra mi ralhraang motor pasarih cu Tigyaing peng Kyawitaw khua pawng ah bomb puah an tong. Khuami pakhat nih “motor pahnih cu an kaang, a dang panga cu Myitkyina lei ah an lan thluah mah.
PDF pawl nih i bawm in an puah mi a si,” tiah a chim. A lan mi ralhraang motor panga zong cu Mawhan le Namsiaung khua pawng ah zaan suimilaam 7:00 hrawng ah bomh puah an tong than i motor pathum cu an kaang dih, motor pahnih cu tlawmpal lawng aa rawk caah an lan chih tiah tualchung mi nih an chim.
Bomh pauh a tong mi ralhraang motor hna hi Sagaing lei in Kachin ram lei ah riahcaw le ralhraang thazaang chap ding in kuat kalter mi Tatmah 88 le Tatmah 77 tang um battalion an si tiah kan theih. Cu kahdohnak ah ralhraang 30 hrawng an thi tiah Moengyin PDF nih an thanh. A thi mi ralhraang hna cu Moengyin PDF nih zaan ah an ruak an fimtawl hna tiah mit hmutu nih an chim. Ref: DVB
Tlangcung hriamtlai phu lak ah a thazaang a thawng ngai ngai mi, tulio SAC ralhrang dohnak ah biatak tein a cawlcang cuahmah ve mi KNU nih Thantlang inn kangh kong ah cathanh an chuah ve lawng si loin Chin mipi dihlak ah kan dir ti tiah an langhter. Cun an cathanh chuah mi ah SAC ralhrang faak ngai in sualphawtnak an tuah i Thantlang mipi an ngaihchiat nak kan hrawm pi hna tiah an langhter hi asi.
SAC ralhrang nih hriamnam a tlai lomi, sualnak a ngei lomi mipi cung ah faak tuk in a tuahsernak, inn le lo a khangh mi cu faaktuk in sual kan phawt tiah an cathanh ahcun an langhter hi asi. Cu lawng si loin Chin ramkulh, Thantlang khuapi mei in an khangh mi, an hrawh mi nih a luancia kum lio ah Kawl ralkap nih Karen miphun pawl kan umnak hmun le khua paoh ah vanlawng in Bomb an thlak i cihmih an timh nak zong a thar in an kan theihter tthan tiah sullam ngei ngai in an langhter chap fawn.
KNU cathanh nih an langhter chih mi ah “Innlo kangh a tuar tu le thahnawnnak le hramnak a tuartu Chin mipi nan dihlak nan ngaihchiat nak kan i hrawmpi hna, tutan SAC ralhrang dohnak le hramhram in nawlngeihnak a chut tu SAC ralkap a cihmihnak ding in raldohnak ah hmunkhat te ah kan dir, Chin mipi dihlak he kan dirti, kan i dirkamh hna i kan in tuar pi tuk fawn hna tiah an langhter hi asi.
Chan chung kawlmi thilri le inn lo vialte nikhat ah an ciam dih ko cu ahonih dah a celh hnga? Kan phone a kuai sual hmanh ah zaran kan celh lo khi. Nan tuar ning a fak hringhran ko mu. Miphun nan dawt tuk caah tuar a har tukmi fahnak kha tuar zia nan thiam.
Myanmar rammi dihlak hmai ah a pical tukmi zohchunh tlak nan lungput a lang. Pathian tu nih in hnemh hram ko hna seh. Chin thisa ngei poah kan lung a fak, kan in tuarpi hna, thlacam kan in bawmh hna. Ram a daih tikah Thantlang ser thannak ah thazaang chuah ding kan i ready cio ko hna.
Leave a Reply