Sagaing ramṭhen, Myiang peng chungah a um mi khualuh/khuachuah nak gate cu Myiang peng PDF le mizapi runvennak phu – CDSOM nih an lak i kanmah nih check nak kan tuah cang lai tiin an thanh. December 3 ah Chindwin tiva in a rak ra mi ralhrang tilawng Shwe Juu Phyo C le B cu “Hna-Lung-Hla gate” ah an tlaih hna i an phorh mi thil pawl zong zulhphung ning tein kan check lai tiah an thanh chap.
Myiang khualuh/khuachuah i gate ah check nak tuah a si lai i ralhrang ngeihmi thil vialte cu mizapi thil ah chiah a si lai i PDF le khuami hna caah hman a si lai. Mah kan tuah mi a zul duh lo mi cu fak piin dantat a si lai tiin CDSOM nih thawng a thanh. PDF nih Mipi sinin thil lak lo ding a si lai i ralhrang he aa pehtlai mi poh kham a si lai tiah thawngthanhnak ah an langhter chih.
Ralhrang bu nih chuah mi thil zuar le phorh mi kan hmuh ah cun lak piak a si lai, a herh ning in dantat a si lai tiin ralrinpek nak zong an chuah tiah Khet Thit Media nih a ṭial. Theihternak : The Chin Post nih kan tialmi thawngpang le ca dangdang hna hi kanmah chimh hmasa loin zalong tein lak khawh a si ko. Asinain kan thawngpang le ca dangdang a la mi hna nih Credit: The Chin Post ti te hi kan tialpiak hram u.
Cheukhat cu Credit an kan pek lengmang ko nain cheukhat cu an kan pe duh bak lo. Cun cheukhat cu thawng kan laknak media Credit kan pekmi lawng an langter fawn. Rethei ngai in kan tialmi kha fawitein tangka laknak ah nan hman khawhmi cu a tha tuk ko. Credit – The Chin Post
Nizan December 3 ah khan Chin Baptist Church of USA aiawh in Mizoram ah tlawng lio mi hna nih Lai Autonomous District Council (LADC), Chief Executive Member (CEM) Pu V Zirsanga tonnak an ngei. CBCUSA Hruaitu hna nih hin Pu V Zirsanga cu amah CEM zung ah an va ton i LADC cozah le NGO bu hna nih Myanmar ram buai ruang i LADC ram chung ah aa dor lio mi ralzam an rak donnak le zohkhenhnak hna cung ah lunglawmhnak bia an chimh.
Pu V Zirsanga nih cun Myanmar ram buai ruangah LADC ram chung i ralzam in a lut mi hna thlanglei Lai mi nih an rak don ning le zohkhenh hna ning cu CBCUSA hruaitu hna a chimh hna. LADC cozah zong nih ralzam zohkhenhnak kong ah thazang tampi a chuah rih naklai kong le Myanmar ram buainak cu zei tiang dah a rauh rih lai,
A fian lo caah ralzam zohkhenhnak le tawlrelnak kong hi tuaktan deuh i felfai deuh in kalpi a herh kong zong a chimh ve hna. CBCUSA hruaitu hna nih cun Lawngtlai khuapi cu Lai mi ca ah kan Jerusalem khuapi bantuk a si kong an chim i, LADC cozah cu Laifa vialte bochan mi a si bantuk in nu can pa can cang in dawtnak he ralzam an rak zohkhenhnak vialte cu philh khawh a si ti lai lo kong an chim.
CBCUSA hna hi an General Secretary Rev Dr Thlaawr Bawihrin nih a hruai hna i, LADC cozah CEM Pu V Zirsanga hi Executive Member Pu L. Daniela, Executive Member Pu C Hrangthianga, Pu CL Lianzuala Deputy Chairman le Jt. Secretary Pu LZ Tluanga hna nih an telpi ve, tiah thawng kan theih. The Chin Post
Leave a Reply