Paletwa Khrihfabu Fonh Pastorte nih SAC bawmhnak tangka an cohlan i miharsa pek timh, September 11| SAC ralkap nih Pastor pakhat ah Ks.18,000 bawmhnak he pehtlai in Paletwa Baptist Biakinn ah Paletwa Khrihfabu Kip Fonh Upa hna nih SAC bawmhnak an cohlan i miharsa kan pek hna lai tiah an chim, tiah theih a si. Paletwa Churches Council in President a si mi Rev. Thing Be nih, “Hi kong ah Penguk zung ah meeting kan ngei. Kannih Paletwa hi Peng dang he kan ilo lo.
Cucaah, COVID-19 kong lawng si loin kanmah nakin miharsa deuh pek ding in ca kan tial i an kan cohlan mi a si. Kanmah zong cu Peng dang he kan i lawh lo ca ah fel tein kan ruah hmasa ko. Hihi miharsa caah a si i tangka lawng si loin pe, chiti le facang tehna aa tel,” tiah a chim. Hi kong ah SAC phu nih Paletwa Peng Pathian riantuantu minung 310 caah tangka Ks.558,000 an pek hna tiah theih a si. Hi bawmhnak kong ah Falam le Hakha Pastorte nih cun an khirh than hna. Mindat belte Zaatlang Bu sin ah an pekchin, tiah Zalen nih aTial. The Hakha Times
Lungler sakhan kah ruang ah a zaam mi hna Mizoram Cherhlun le Ngharchhip khua nih an va don hna – 2021 September 10 Thantlang Peng, Zahnak tlang Lungler sakhan kah ruang ah khua chuah takin himnak lei ah a zaam mi hna cu Mizoram, Cherhlun le Ngharchhip khuami hna nih nihin September 11 ah an va don hna tiah thawng kan theih. Atu an va don mi hna hi a tam deuh cu Lungler khuami le pawngkam khuami hna an si. Hi kong he pehtlain Thingsai khuasa T Zosangpui nih,
“Lungler sakhan kah ruang ah a zaam mi hna hi Cherhlun le Ngharchhip khua mi hna nih tlangrian hrihhawh in an va don hna. Khuachung i motor a um mi poh kal in an umnak hmun tiang an va don hna,” tiah a chim. Hi ralzaam hna ca ah zeitindah khuami nih an tawlrel lai i an zohkhenh hna lai ti thawngfiang a um rih lo. Lungler sakhan kahnak ah CNA/CDF lei in a thimi an um lo nain minung 7 hliam an tuar i SAC mithat phu lei zong tam ngai an thi tiah kan theih. Myanmar ram uknak hramhram in Min Aung Hlaing nih a laak hnu Mizoram ah a zaam mi hi nihin tiang minung 1000 fai an si cang. Hi chung ah CM hlun Salai Lian Luai telh in MP minung 20 leeng an si cang tiah kan theih. The Chin Post
Mizoram Thingsai khua ah Chin ralzaam umnak ca ah tiin sangthar an samh – Mizapi thimmi Myanmar ram uknak Min Aung Hlaing nih February 1 ah a laak hnu ram buainak ruang ah Mizoram Thingsai khua lei ah a zaam mi Chin ralzaam hna umnak ca ah tiin khuami nih sangthar an samhpiak hna tiah Thingsai khuami hna sin in thawng kan theih. Min Aung Hlaing le a ralkap hna nih mizapi thimmi Cozah sin in uknak hramhram an laak hnu Mizoram Thingsai khua ah Chinmi a zaam mi hi minung 200 leeng an si. Ralzaam umnak ca ah sangthar an samhmi kong he pehtlai in Thingsai khua mi pakhat nih,
“Ralzaam hna umnak ca ah tiin inn 10 kan sak cang. Inn kan saknak zong hi Thingsai khuachung sangthar samhmi chung ah a si. Ralzaam hna chung ahhin CDM hi chungkhar in pathum an si. A dangtu hi cu tihphan ruang ah a rak zaam deuhmi an si,” tiah a chim. Ralzaam um nakding inn saknak ca ah tiin Member of Legislative Assembly, Mizo Zirlai Pawl,Young Mizo Association,Mizo Hmeichhe Insuihkhawm hna nih a cungcih cawknak le ralzaam eidin tuktak an tawlrel i khuapi nih thing le mau pawl an tawlrel ve tiah theih a si.
Cun, ralzaam hna umnak kong ahhin Village Council lei nih tuanvo an laak tiah kan theih. Cun, “Atu ralzaam umnak sangthar samh mi hi Electric mei zong lam zong tha tein tuahpiak dih an si. Camp i a ummi poh hi Electric mei zong free in an hmang kho lai. Ralzaam ca ah tiin bawmhnak an pekmi hi tangka in siseh mehhang in siseh a dangdang zong in mizapi nih an pek cio hna,” tiah a cunglei khuami nih a chimchap. Myanmar ram a buai hnu Mizoram lei a zaam mi ralzaam ngakchia hna zong a rauh hlan ah sianginn kaiter ding in Mizoram Cozah nih timhlamhnak a ngei cuahmah tiah kan theih. the chin Post
Leave a Reply