Monywa Khuapi No.2 Palek Sakhan Cu South Monywa PDF Nih Bomb An Puah I Palek 2 Thi: Sagaing ramthen, Monywa khuapi No.(2) Palek sakhan cu October 11 zan suimilam 11:00 hrawng ah PDF- South Monywa nih kut chehmi bomb in an cheh i palek 2 an thi tiah PDF – South Monywa nih cathanh an chuah.
PDF- South Monywa cathanh ah cun “PDF- South Monywa nih nizan zan suimilam 11:00 ah No.(2) uico palek sakhan chungah bomb kan cheh i uico palek 2 an thi , hliammi an um le um lo, an um ahcun zeizat dah an si ti cu kan theih kho rih lo. Kanmah lei ah pakhat a ke ah tlawmpal aa hliam nain thinphan ding um lo “ tiah an langhter. Ref: Khit Thit Media
Sagaing ramtthen, Dipeyin peng, Hnaw timi khua ohsuh, Thit Yar Eih timi Min Aung Hlaing ralhraang palik sakhan cu a luan ciami October ni 9, kum 2021 zan suimilam 9:15PM ah khan a ho ti theih lomi phu nih mei in an khangh. A tu bantuk in an khanghmi ralhraang palik sakhan hi a luan ciami August thla thok khan ralhraang palik pawl an rak um ti lo, a si nain ralhraang pawl nih hmunhma khuarnak ah an hman sual lai ti an phan ruangah mei in an khanghnak hi si.
Hi kong he pehtlai in khuami pakhat nih “tuan ah cun Yi Oo peng, Taung Pin lei in a rak kaimi ralhraang pawl nih hmunhma khuarnak ah hman an timh timi thawngpaang rak theih si, a si nain cu ralhraang a rak kaimi pawl cu lampi ah PDF nih an kah hna ruangah an rak kai ti lo, zei bantuk phu nih dah an khangh ti cu kan thei kho ve rih lo” tiah a chim. Ralhraang sakhan an khanghmi ah a rak ummi palik pawl hi Dipeyin peng myoma palik zung ah an va fonh dih, a si nain hi hnu ah hmunhma khuarnak ah an hman sual ding an duh lo caah an khanghmi si.
ASEAN Palai Naypyidaw A Phan, Tuni Ah Ramkhel Party Cheukhat He Tonnak An Ngei Lai: Myanmar buainak tuahremhtu dingah ASEAN nih tuanvo an pekmi ASEAN palai Ery Yan Yusof cu Oct 11, nizan kha Naypyidaw a phan i tuni ah ramkhel party cheukhat hna he tonnak an ngei lai tiah theih a si.
Ralhrangbu nih Suh Kyi he tonnak nawl an pe hna lai maw ti bel fiangin an chim rih lo. Asinain ralhrangbu chimnak nawlngeitu Bochoh Zaw Min Tun nih “Tazacuai liomi hna le phungninglo bu ah chiahmi hna he tonnak nawl kan pe hna lai lo” tiah nai ah khan a chim.
Suh Kyi le President U Win Myint cu tazacuai liomi an si caah ASEAN palai he tonnak nawl an pe hna lai lo ti zumh a um. Myanmar ah phungning tein register a tuahmi ramkhel party 93 an um tiah Union Election Commission website ah an langhter. Hi ramkhel party 93 chungah zei party he dah ASEAN palai hi an i ton lai ti fiangin theih a si lo.
Hmasa ah cun USDP, Rakhine miphun hruaitu pakhat Dr. Aye Maung dirhmi Arakan National Party (ANP) le Shan National Democratic Party (SNDP) hna he tonnak an ngei lai tiah bia a leng nain thawngfiang fehtermi cu a si lo tiah RFA nih a tial.
Leave a Reply