Pakistan politics buainak; Prime Minister Imran khan ‘zumhlonak motion’ a kal cuahmah lio mi ah Pakistan President Alvi nih cun prime minister rian tlai chung ding an thiah hlan Imran khan cu PM a si rih lai kong a chim.
Pakistan Prime Minister Imran khan zumhlonak motion cu a luancia thlakhat ah khan National Assembly ah eptu party hna nih an rak luhpi i, Imran Khan nih hin thlawptu a ngeih setsai lo caah PM si kho ding a si ti lo. National Assembly(NA) ah eptu party hna nih motion a luhpi mi cu Deupty speaker Qasim Suri nih a pompiak hna lo i PM nawlnak bantuk in NA zong pehzulh rih lo ding ah ṭheh a si. Motion pom duh lo kongkau ah hin Pakistan Army nih cu an ram politics buainak ah an i tel ve lo kong an thanh colh ve.
Eptu party lei nih cun Motion pom lo le NA ṭheh kongkau ah hin Pakistan Supreme Court ah biazual an koh colh i, Chief Justice Umar Ata Bandial nih cun PM Imran Khan cawlcangh ning cu dothlat a si lai kong a chim ve.
Pakistan ah hin kum 75 chung cu Prime Minister(PM) term kum 5 tluantling a hmang kho mi an um rih lo. PM pathum cu thah an si i, kum 1958-1973 karlak ah khan Prime Minister an rak ngei lo. Kum 1973 i an ram phunghrampi an remh hnu lawng ah Zulfikar Ali Bhutto cu Prime Minister ah an rak thim ṭhan.
Kum 2002-2022 chung ah khan PM 7 an ngei manh i, an lak i PM rian sau bik a tlaitu cu Yousaf Gaza Gilani a si i, anih zong a term a dih hlan ah a rian in thlak ṭhiamṭhiam a si. Imran Khan zong nih hin PM kum 4 a tlaih manh nain a caan tling tein a hmang manh lai lo, tinak a si. Cred : The Chin Post
Leave a Reply