NUG Cozah Budget American Dollar 800 Millions A Phan Deng Cang National Unity Government (NUG)cozah Budget cu a rauh hlan ah $800 millions a phan colh lai tiah NUG Cozah Vuanci Dr. Toe Khong nih Social media in a thanh. Atu ah NUG/CRPH i bawmhnak a hmuhmi $17 Millions cu hriamnam cawknak ralkap Training tuahnak le
CDMer pawl bawmhnak ah hman a si lai i cazin tha tein tuah a si i $17millions cu NUG Cozah caah chimthlak lo Vui kaa chung i chihria barh tluk a si a rauh hlan ah budget $800 millions a tling lai tiah a tial. Tulio ah PDF pawl hriamnam tampi cawkpiak ding in timhtuah asi i ram pumpi huap in hriamnam hi damhpiak a si lai $17millions in hriamnam zun 5000 tluk a cawk khawh lai tiah theih a si. – Khit Thit Media
Chinchin Pekthang: Sui THANTLANG; Mitthli he kan tian, hmanseh lawmhnak hlasak bu in kan i tong than lai, Kan tlaihchanh mi, kan sian lo mi, kan dawt mi le a kan cawmtu kan Sui THANTLANG, nihin cu kan in sian lo bu in mithli he na cawmken khuami hna nih kan in ttian tak ruangmang. Zungzal ttiantak a si hrimhrim lo mu. Kan um lo kar cu na thlavai a kiang ko lai.
Kan tah ai-hram bantuk in nunnak thaw a ngei mi si law cu mithli dor hnawh cawk lo in na tah-ai hram ve len ko lai, na kan thlauh tuk lai mu. Hmanseh, na cawmken mi khuami dihlak nih nangmah philh lonak le zuun ngaihnak cu kan umnak hmun in hla kan sa zungzal lai. Nangmah lei cuanh in thla kan cam lai. Kan in philh hrimhrim lai lo. Zungzal in kan in kaltak hrimhrim lai lo. Ni nikhat ah kan in hlam than lai i ngaihnak biazaza, lung um-bia zaza kan phaitti than te lai mu.
Voikhat na rawh ah voi hra, voi zakhat in kan in remh than lai. Tuanbia thar le tefa caah ro tha le tuanbia dawh kan chiahtak than hna lai. Kan tuarnak, kan thisen, kan mithli le tem-innak nih ni khatkhat ah a hmun camcim ding mi a theipar a kan zuun ter hrimhrim lai. Na cawmken mi khuami nih mangtha kan in cah chung mu. Kan i tong than hlan tiang Bawipa nih kan kilven hram seh mu — Kan dawt mi Sui THANTLANG! Credit. Chinchin Pekthang
Thantlang Khuami 7,000-8,000 kar an Zaam, Minung 10 Fai Lawng Khua ah an Taang – September 18, Thantlang khua innkangh le pastor Cung Biak Hum meithal in kah a ton hnu ah Thantlang khuachung um ttih a nun cang caah September 19 le 20 ah Thantlang khuami 7,000-8,000 karlak in an innlo an chuahtak i hmundang ah an zaam hna, tiah ttuanvo ngeitu upate sin in thawngpang kan theih.
“September 19 le 20 ah mi tam u cu zaam dih a si cang. A zaammi hi minung 7,000-8,000 karlak cu kan si lai. Atu Thantlang khuachung ah cun bochanmi upa cheukhat he minung 10 fai lawng an taang cang,” tiah atulio Thantlang ralzaam kongkau a tawlreltu Thantlang Placement Affairs Committee (TPAC) chungtel upa pakhat nih a chim. Atulio Thantlang khuachung vung luh zong ttih a nung i atu khuachung ah a taangmi hna zong hi a rauh hlan ah an chuak ve te lai, tiah a chim chap. “Atulio Thantlang khuachung vung luh hi cu ttih a nung ngai, a him lo ngai.
Hi hlan ah cun zei pipa cu kan tong hraw rih lo nain atu hnu belte cu kanmah zong kan kal kho ti lai lo dah. Atu Thantlang ah a taangmi hna zong hi a rauh hlan ah an chuak ve te lai,” tiah a chim. Thantlang khua a chuahtakmi mi hna chung in minung 400-500 karlak hi Mizoram lei ah an zaam hna i a dang hi Thantlang peng khuate pawl ah an i dor hna. Kahdohnak a umnak Lungler telh in khua pathum hi ramlak ah ralzaam dirhmun in an um hna.
“Thantlang ralzaam kong he pehtlai in cazin kan tuah cuahmah lio a si. An i dornak hmunhma pawl ah kanmah pumpak zong vung kal kan i tim. Thantlang peng ralzaam kong ah atu tiang ah cun bawmhnak ngaingai a um rih lo. Ramchung le ramleng bawmhnak khulrang in kan herh ko,” tiah a cunglei ttuanvo ngeitu upa nih a chim chap. Atulio Thantlang ralzaam hna bawmhchanh a duhmi hna nih Phone-09 42393 5703 (TPAC) ah hin pehtlaihnak tuah khawh a si. The Chin Journal September 21, Hakha
Leave a Reply