NUG nih May thal ni 15, a voi 9 nak Rakhine miphun ni ah ca a kuat hna i, mah cakuat ah Rakhine miphun hna nih an intuarnak khamhnak nak hnag ding caah le Rakhine ram nih a cohnga ding pawl co dingin kan i zuam ko tiah mah cakuat ah an tial chih. Mah kong he pehtlai in Rakhine ca tial thiam,
Wah Hein Aung nih NGU Leiin Rakhine mipi hna caah bia in si loin rian in tette piak ding a tinak kong cu CNI ah a chim. Catial thiam Way Hein Aung nih ” Bia lawngin siter lo dingin kan nih nih cun rian in si ter kan duh. A caan caan ah bia cu a holh a tam ton i, rian a si lo zongah cucu a poi lem mi a si lo.
Hlan zongah a tu bantuk in statement pawl chuah piak a si. Rakhine cungah ngaihthiam hal nak zong aa tel. Ngaihthiam zong hal bal a rak si. A tak mithmuh kut tongh a phak taktak tik ah ruah ning bantuk in a si lo. An mah nih cun phung dang dang piin an thlen. A sinian mah cathanh chuah mi cu cathanh chuah mi ning si loin tlamtlinter khawh mi lei ah cun thitunh khawh a si tiah ka hmuh.
An mah zong cu cozah pakhat bantuk in hmuh a si. An mah zong cu Rakhine caah thil tuah khawh ding timi hi a tu lio sining in cun tuah khawh nak lam a tlawm ngai tiah ka hmuh.” tiin a chim. NUG leiin a tu ah Rakhine miphun cungah mi zawnruah bomhchan bomhnak pawl riantuan khawh nak a ngeih caah ri chiah mi pakhat tiang tuanvo laak piak a herh ti zongin a chim chap.
Relchap,SAC nih PDF-Kalay battalion 4 sakhaan an chuh hna. Sagaing ramṭhen, Kalay pengkomh, Kalay peng ah hrambunh a simi PDF-Kalay battalion 4 sakhaan cu May 14 ah SAC ralkap nih vanlawng 3, MI 35 helicopter 2, drone pawl le kekal ralkap 200 hrawng he an doh hna caah sakhaan an lak tiah theih a si.
SAC nih vanlawng in kahdohnak a tuah hmasa hnu ah Infantry 89 in Captain Ya Za Myo, Major Than Naing le Infantry Zwe Thu Htun hna hruaimi SAC ralkap 200 hrawng nih an rak doh hna caah hriam le kuan aa tlukruan lo tuk caah sakhaan cu chuahtak a si tiah PDF-Kalay rianngeitu nih DVB a chim.
Vanlawng kahdohnak ruangah PDF-Kalay in hliamhma a tuarmi an um ko nain a thimi an um lo tiah theih a si.
“SAC ralkap pawl kan sakhaan an phan i sakhaan le sakhaan chung thilrii pawl an hrawh dih” tiah PDF rianngeitu nih a chim.
SAC kahdohnak ruangah Sheshin, Laykya, Kokul le Shaṭaw khua 6 in mipi 5,000 leng cu ram tangah an zaam dih tiah theih a si.
“Kan zaamnak hmun pawl SAC nih van lawng in an kan kah. Vawlei lei zong in an kan doh. Kan zaam lengmang. Kan inn pawl cu an kan khanghpiak dih caah umnak hmun kan ngei lo, ram tangah buk kan i sakmi zong an kan khanghpiak chih” tiah a zaammi pakhat nih DVB ah a chim.
Ralzaam 5,000 leng cu eidin an har tuk caah bawmhnak an herh ko tiah theih a si.
Leave a Reply