D-Day Thanh A si Hnu Magwe Hrambunh Vanlawng Cawlcanghnak Ngeih. D Day asi cang lai tiah thanh a si hnu zarhkhat tluk zuang loin a um mi Magwe ah hrambunh in chiah mi vanlawng pawl cu tuni zinglei sml 9:00 thok in an zuang, tiah a hmun um mi sin in theih a si.
Magwe vanlawng tumnak hmun in zinglei sml 9:00 in minute 50 chung hrawngah raltuknak vanlawng a tlawmbik pathum a zuan kan hmuh tiah a hmun um mi sin in kan theih. NUG nih ram pumpi ralhrang uknak doh ding cu 2021 September 7 zingka sml 8:30 i a thanh hnu ah SAC lei in cunglei vanlawng le tanglei he an cawlcanghnak cu hmuh khawh a si. Source: Tachileik News
CDF-Zophei Caah Kan Tangti Hna Lai – NUG nih kan i hngahlang mi ral dohnak cu nihin 07-Sept 2021 ah phung ning tein a phuan cang.Baibal zongah Pathian mi le fa hna nih ral an rak do lengmang.Cucaah atu kan doh mi ral hi a thianghlim mi ral dohnak a si. Hi a thianghlim mi ral dohnak ah catang ngei le ngei lo,mirum le mi sifak,pastor le cozah riantuan mipi vialte ral doh khawhnak thazang le caan tha aa rual tein kan ngei dih.
Nuhmei le pahmei tiang nih a ti hal mi CDF caah ti hrai khat dinh nakin an tuan khawh lio caan tha a si.Cucaah zophei mi fa vialte ramleng le ramchung, khuapi le khuate ummi kan dih lakin CDF-Zophei caah lungrual tein kan tanti nak caan tha cu kan liang cungah a phan cang. Hi ral dohnak kan theih khawhnak ding caah cun kanmah le ramri hmun (territory) cio kan ven (control) khawh a hau.
Cu hnu lawngah Chinram territory vialte kan lak khawh ding a si.Cu ve bantukin PDF zong nih anmah territory a si mi abikin Yangon,Mandalay le Naypidaw an tuk a hau ve.PDF anmah lawng cun ei le bar taktak an chuah pi lai ti zumh a har.Cutikah tlangcung hriamtlai hna nih va chanh an hau te hnga.Cu bantuk va chanh khawhnak ding caah cun CDF bantuk le tlangcung hriamtlai thawn hi a hrampi cu a si.
Socialist (centralization) uknak nih caan sau tuk kan thluak a rak kan tawl i zei thil kan tuah poah ah Bahu cozah (central government),Bahu party (central party) lawng kan khuaruahnak kha atu ahcun abingtalet (upside-down) in Federal democracy cu kanmah hmunhma local ah hrambunh in ser a si ti kha tuanbia nih fimnak kan pe cang ko seh!
CDF-Zophei kan unau hna nan lungput le nan lung a thawnzia kan theih tikah hi lawngin 50% cu teinak kan ngah cang.Meithal aa tlaih lo vialte zong kan lungthin dih lakin kan in tanpi hna. A dang 50% caah kan thazang dih lak kan chuah ve lai i teinak kan ngah hrimhrim lai. Kan Bawipa Pathian nih in hupphenh ko seh!
Leave a Reply