NUG he Kawl ralkap ralhrang dohti ding ah tlangcung hriamtlai tamdeuh cu an i lai Cang

NUG nih EAOs he fonh in raldohnak lei committee a ser NUG le tlangcung hriamtlai phu (EAOs) i bawmh in raldoh tinak caah committe pakhat an ser. Cu Committee cu Central Command and Coordination Committee an ti i, a tawinak in C3C tiin an auh tiah Myanmar Now nih nihin 28 October 2021 ah a tial.

NUG he ser mi committee ah tlangcung hriamtlai phu in zei pawl dah an i tel timi cu NUG humhimnak zung (ministry of defense) in chungtuan a si mi U Naing Htoo Aung nih a chim chih lo. NUG tang ummi PDF le tlangcun hraimtlai paoh hmun khat ah raldohti khawhnak ding ah ralkap lei uknak zong kalti kho ding in timh tuah a si.

Ralkap hruainak lei committee zong a dotdot in kan ser cuahmah tiah U Naing Aung Htoo nih a chim. “Committee ah NUG cozah i humhimnak lei in ralkap lei tuanvo ngeitu kan in tel bantuk in tlangcung hriamtlai phu in ralkap lei tuanvo ngeitu, hruaitu an i tel ve. Tangti le i bawmh in ralhrang kan doh ti lai,” tiah U Naing Htoo Aung nih a chim.

NUG he Kawl ralkap ralhrang dohti ding ah tlangcung hriamtlai tamdeuh cu an i lai nain, aa tel rih lo mi cheukhat an um caah aa tel mi an min an langhter rih lo. A dang tlangcung mi hriamtlai pawl tel khawh nakding ah ceihmaihnak kan ngeih lio a si tiah NUG nih thawng a thanh.

“Kan i timhnak leng in NUG tang ah a ummi ralkap abik in PDF a let in kan karh. Cun NUG zong nih biatak te in hriamlei zalhpiak le bawmh khawh zong kan tawlrel cuahmah. Kan i ruah leng in rian kan tuan kho ko,” tiah U Naing Htoo Aung nih cun a chim.

Paletwa peng le Sami ah ralhraang cohlannak tuah ding ah facang tin hnih in an leemsoi hna, October 28, 2021 Chinram Paletwa peng le Sami ah ralhraang cohlannak tuah ding i aa tel mi poh facang tin hnih kan in pek hna lai tiah leemsoinak an tuah. “Ralzaam pawl hi hramhram deuh in auh hna dawh an si.

Lam zawh nakding hmun hi GAD Zung in Sipin zung tiang kal ding, cun kir than ding a si. Aa tel duh mi poh cu facang tin hnih pek nan si lai. Leikkung sang hna ah cun minung 50 chuahpi ding tiah an ti hna,” tiah Sami khuami pakhat nih a chim. Paletwa peng chung ah 2017 thawk in ralhraang le AA hriamtlai kahdohnak ruang ah khua chuah taak in a zam mi ralzaam hna cu Paletwa le Sami khua ralzaam camp an atu tiang an um rih. Ref: Mizzima

Be the first to comment

Leave a Reply

Your email address will not be published.


*