NUG cu a thawng bak cang ko hih, thawngpang tha tuk a si!!

NUG Nih US Telh In Ram 8 Ah Palai Zung An On Khawh Cang
===============
Hramhram in nawlngeihnak latu SAC cu sualphawt le mawhchiat an tong chin lengmang i cu lioah NUG nih ramleng ah palai zung 8 tiang a on khawh cang. Nov 18, 2022 ah US ram ah NUG palai zung cu tluang tein an on cang.

US i NUG palai zung cu US Cozah hmunpi Washington DC ah an on i White House in meng cheu lawng aa hlat. NUG nih palai zung an on cang nak ram hna cu UK, Australia, France, South Korea, Japan, Czech Republic, Norway le US hna an si.

Phungning tein NUG palai zung onnak nawl a petu ram/cozah hna cungah SAC nih an lungtlin lonak cathanh an chuah ve. Palai zung an on cang nak ram hna nih NUG hi Myanmar ram aiawhtu cozah an si tiah cohlan taktak um rih lo hmanh seh law palai zung onnak nawl an pekmi hna nih NUG le Myanmar mipi hna lei ah an dir ko ti kha a langhter. Crd-The Chin Post

SAC Ralkap Nih Khin U Le Shwe Bo Peng Khuate 5 An Khangh Caah Inn 200 Deng A Ciam, Sagaing ramṭhen, Khin U peng le Shwe Bo peng ah a ummi Paunglaykone(ပေါင်းလဲကုန်း), Latpankyi, Hnedwin, Sisonelay(ဆီဆုံလေး) le Leikyakone(လိပ်ရကုန်း) khua hna cu SAC ralkap nih an khangh caah inn 200 deng a ciam, tiah theih a si.

November 18 le 19 ah SAC ralkap nih Khin U peng Paunglaykone khua ah inn 100 leng an khangh pinah November 19 ah Hnedwin khua inn 1 an khangh chap, cun nihin November 20 ah Latpankyi khua inn 50 leng, Sisonelay khua inn 8 le Shwe Bo peng Leikyakone khua inn 30 leng an khangh ṭhan, tiah theih a si. SAC nih nawlngeihnak an lak hnu in Khin U peng ah 2022 October thla tiang khuate 47 an khangh i inn 1,856 a ciam. Cu pinah tualchung mi le PDF 218 an thah hna i, 143 tlaih an tong, tiah theih a si.

Monywa In Sagaing Lei Ah A Kalmi SAC Ralkap Motor Run 10 Bomb Puahhnawh An Tong, 20 An Thi, Monywa in Sagaing lei ah a kalmi Sagaing Tatma 33 in motor 10 cu, November 19 ah Alakapa khua le Wunpyi khua karah bomb in voi 5, cun Wunpyi le Myinmu khua karah voi 1 tiin bomb voi 6 kan puahhnawh hna, tiah Army To Fight Dictatorship (PAFD) in ṭuanvo ngeitu pakhat nih a chim.

Sagaing Tatma 33 in a chuakmi SAC ralkap motor 22 cu November 19 zing sml 11:00 hrawngah Sagaing in Monywa lei ah an kal. A zanlei ah Monywa in Sagaing lei ah motor 10 an kir ṭhan i cu a kir than mi hna kha bomb kan puahhnawh mi hna hi an si, tiah People’ Army To Fight Dictatorship (PAFD) in ṭuanvo ngeitu nih cun a chim chap.

Chun sml 12:00-1:00 karah Monywa in Sagaing lei ah a kir mi motor hna cu PDF nih bomh in voi 6 an puahhnawh caah ralkap 20 an thi i, an ruak cu Nyaungpinwun(ညောင်ပင်ဝန်း) sakhan ah an chiah hna, tiah theih a si.

Cu bomb puahhnawhnak ah People’s knight Defense Force Myinmu (PKDF-MMU) le People’ Army To Fight Dictatorship(PATFD), TAUNGTHA People Defense Force (TTAPDF) ၊ D.B.B.F- MMU ၊ PAFD, Companny Dog Killers People Defense Force Myinmu (DKPDF) hna an i tel, tiah theih a si.

FIFA World Cup 2022 Cu Tuzan Ah Thawk A Si Cang Lai, Caan saupi pumpululh zohtu(fan) hna nih kan i ngaih bik mi FIFA World Cup 2022 cu Qatar khuapi Doha ah thawk a si cang lai. Tutan FIFA World Cup an chuihnak hi Middle East ram lin/lum a si caah vawidang bantuk siloin nikhua a kihdaih deuh caan November-December ah chuih a si lai.

Middle East ah World Cup an chuih a vawikhatnak zong a si lai. Hi ruangah hin vawleicung ram tampi league chuih lio mi cu a hnursuan i, players zeimawzat zong hliamkhuai an ton ruangah World Cup an chuih kho lo. Cu pin ah vawleicung nihrin covo phu hna sin in tutan Qatar World Cup hi soisel a tong ngai fawn. FIFA World Cup dong ding in an i timhsaihnak ah Qatar nih nuhrin covo a buar; Qatar cozah fel lo ruangah rianṭuantu tampi nunnak a liam, ti a si.

Muslim ram a si bantuk in zu khapnak ram a si i, stadium chung ah beer zuar le din an siang lo. Cucaah sponsored zeimawzat nih an chuahtak hna, tiah thawngpang a leng. Muslim biaknak nih nudawk padawk(Gay) a cohlan lo bantuk in certual ah gay dirkamhnak langhter lo ding Qatar siangpahrang nih FIFA a rak theihter cang. Cucaah nuhrin covo a dirhkamhtu hna nih a doh ngai i tutan World Cup cu ka zoh lai lo a titu minung zong an tam.

Tutan World Cup donnak ah hin Qatar cu $229 billion bak a dih i, vawleicung tuanbia ah a dihheu bik World Cup a si. Stadium(Certual) dawhdawh cu muisam phundang ngai in an sak i, riahbuk(hotel) ṭhaṭha zong an sak. Ram hme te an si nain Oil le Gas ah a rummi ram an si caah an i timhsaihnak ah phaisa an dih hringhran.

Hramthawk puai(Openning Ceremony) cu tuah cuahmah lio a si cang i, pumpululh chuih taktak cu Myanmar caan zaan suimilam 10:30(9:30 IST) ah inn ngeitu Qatar le Ecuador nih an chuih lai. Tutan World Cup ah hin ahodah bualco lai? na ruahnak zalong tein comment ah chim khawh a si. Crd-The Chin Post

Aung La Nsang Aa Thongh Man(Dollar sing 2, kawlram phaisa in sing 5000 nak tam), One Championship nih thonghman zei zat a pek hna hi a thanh bal lo. Sinain Media pawl nih an dotthlat i an theih than tawn( dikthlir cun si kho ve lo).

Aung La Nsang nih Champion a si lio ah thonghman hi dollar sing 2 a hmuh tawn. Nain champion a si ti lo hnu cu dollar sing khat lawng a hmuh. Teinak a hmuh tu ah cun laksawng dollar sing khat chap a si tiah thawngla tu Rauf Chaudhry nih a chim.

Tutan ah Yushin Okami a tei i dollar singkhat a hmuh. Teinak a hmuh caah dollar singkhat pek chap a si. Round khatnak ah a tei caah laksawng dollar thong 50 hmuh rih ding si nain rikhiahmi nakin a rih deuh caah an pe lo. Tutan thonghnak ah a hmuhmi dihlak dollar sing 2 a si( Tulio dollar thlen in kan tuak ah cun Sing 5000 nak tam a hmuh ti khawh a si).

Be the first to comment

Leave a Reply

Your email address will not be published.


*