Australia Ah NUG-Australia Palai Zung Hunnak An Tuah Cang
===============================
National Unity Government(NUG)-Australia palai zung hunnak puai cu nizan August 3 zanlei ah kan tuah, tiah NUG- Australia aiawh zung nih an thanh. Cu hunnak puai ah cun Australia ram political party ngan a simi, The Australian Greens nih NUG cu Myanmar cozah a si tiah Official in a cohlan, tiah a thanh pinah a dang political party zong nih NUG cu Myanmar cozah a si ko, tiah cohlannak cathanh chuah ve ding in NUG- Australia palai zung nih a forhfial hna.
Zung hunnak puai ah Australia ramleng zung in lutlai hna le Newzaland ram i Australia Embassador changtu pa zong a kai, tiah an thanh. NUG cozah ramdang Minister Zin Mar Aung le biaceihnak lei Minister Thein Oo nih saduhthah bia an chim. NUG- Australia aiawhtu Dr. Htun Aung Shwe nih lawmhnak bia a chim ve. A luancia July 31 ah NUG-Janpan palai zung cu hunnak an rak tuah cang. Kum khat leng chung ah NUG nih palai zung 7 an hun cang, tiah theih a si.
Chin Ramkulh Paletwa Ah SAC Ralkap le AA Kahdohnak A Zual!: Chin ramkulh, Paletwa peng ah SAC ralkap le AA hna cu August 1 in 3 tiah pehtlai in an i kap, tiah theih a si. Paletwa khua thlanglei Kaladan tiva nichuah lei Na tlang lonh lam le Namaṭa khua pawng ah kahdohnak a chuak i, Battalion 289 nih kahdohnak hmunhma cu hriamngan in an kah, tiah Paletwa ummi pakhat nih a chim. Kahdohnak ruangah SAC ralkap nih Kaladan tiva thluan a kalmi vokkuanglawng hna cu chekhlatnak an tuah hna, tiah theih a si.
August 2 ah Ṭungmawa khua siangsangrun ah sianginn a kaimi hna cu, vokkuanglawng i cit in an ṭin lei ah SAC ralkap nih an kah hna caah kum 12 hrawng tang nga kaimi siangngakchia pa pahnih cu a hmun ah an thi. Siangngakchia pathum zong hliamhma an pu. Paletwa peng ah SAC ralkap nih a hlan lio tein ti lam le tlang lam an rak phih caah eidin phorhnak a har ngai. Atu lio zong ah kahdohnak a zual i, Paletwa khuami hna cu eidin le a dangdang thilri an har ngai, tiah theih a si.
Relchap, Tunbia duhtu caah, Lothlopa Tuanbia, Ni khat cu, Jesuh cu rili kam in mi tampi a cawnpiak hna. Minung cu tam tuk hringhran hna kaw, lawng chung ah a kai i cu kaa cun bia cu a chim. Jesuh nih tuanbia pakhat a chimh hna. “Lothlopa pakhat cu thlaici tuh awk ah aa thawh. A kut chung in thlaici cu a theh tikah a cheu cu lam cung ah an tla i, va an rak chuak i an char dihl.”
“Thlaici dang cu vawlei um setsailonak lung lak ah an tla. Lung lak vawlei i a tla mi thlaici cu khul rang ngai in an hung keoh. Nain ni a hung chuak i, khua a linh tikah, an uai zau i, an hram thuk hna hlah kaw an thi dih.” “Cheukhat thlaici tu cu hling bur lak ah an tla. Hlingbur nih a zik hna i an voi kho lo.”
“Thlaisi dang cu vawlei ttha cung ah an tla. Cu thlaici cu an keoh i, a let 30, 60, silole a let 100 tiang tam in an voi. Hna a ngei mi nih cun thei ko hna seh!” Cu tuanbia nih cun a zultu pawl cu an lung a tuai hna. Jesuh nih, “Thlaici nih cun Pathian Bia a aiawh. lam cung i a tlami thlaici cu Pathian Bia a thei ko nain a hngalthiam kho lo mi hna, cu ruang ah an theih mi bia zong cu an sin in khuachia nih a lakpiak tthan hna, ti chim duhnak a si.”
“Lung lak vawlei i a tla mi thlaici nih Pathian Bia a thei i lawmhnak he a pom colh mi hna a aiawh. Nain harnak le hremnak a tlun tik tu ah cun an zumhfehnak an ngeih lo ruang ah an tlu tthan tawn.” “Hling bur lak i a tlami thlaici cu Pathian Bia a thei i a zum mi bantuk an si. Nain caan a hung rau deuhdeuh i, Pathian an ttanhnak cu vawlei thil dangdang rumnak le nuamhnak tehna nih a dawrh dih tawn. An theihmi cawnpiaknak nih an nun ah thei a tlaiter kho lo.” “Vawlei ttha ah a tla mi thlaici nih cun Pathian Bia a thei, a zum i, thlarau theitlai a tlai mi hna a chimduh,” tiah a ti.
Pehrih, NGATAINU, Hlan lio ah khua pakhat ah nufa an rak um. A fanu cu a min ah Nga Tai tiah a auh. Nga Tai cu aa dawh tuk ah hin a hmumi paoh a duh lomi an um lo, zoh an rak cim hrimhrim lo. Mikip nih an dawt, a pumrua that le a tungtai rem lengah a hmaithlak hrim hi a rak I dawh tuk ti a si. A mitmu hrimhrim hi thipum fang dawh in aa dawh I a mit-au nih zing niceu bang a rak I dawh ti a si. A samthlai nih le aa rem i a ziaza le tha kaw, nu sinak a tlinh lengah a aw a nem i a pawngkam a ummi paoh nih an lawmh dih tawn.
Kum khat cu ruahpi a sur ciammam i a han kho ti lo. A fak chin lengmang i ti a lian thluahmah. Cucaah an inn le an lo zong a phum thluahmah. Mi vialte cu an inn an lo chuah tak in ti nih a phak rih lomi tlangcung ah an kai dih. A kai kho lomi cu ti nih a phum hna i an thi len cang. Ti cu a thang chin lengmang i tlang cu phum dih a timh cang. Saram pawl zong tlangsannak cu an panh cio. Minung le satil saram hna cu tlang a sannak bik ah cun an i sual len hna. “Zeidah a cang hna?” tiin zapi cu khuaci mui in an tap, an ai, an hram len.
Ti cu a thang chin lengmang i “Tai, Tai, Tai” tiah Nga Tai min chim pah in tlangpar cu a hun naih chin lengmang. Ti awthawng cu an theih tikah “Ti nih hin Nga Tai hi a duh caah a si ko,” tiah an ruah. A sam pakhat an phawi i ti lak ah an thlak. “Tai” a ti i ti cu tlawmpal a vung zor. Asinain a rauh hlan ah a hung thang than. A angki an thlak than. “Tai” a ti i ti cu a vung zor deuh nain “Tai, Tai” a ti i a hung thang than lengmang. Cuticun Nga Tai sam le thilri le a hnipuan cu an thlak dih cang.
NGATAINU: Ti cu “Tai, Tai” a ti i tlang ah a hung kai chin lengmang. Khuakhan awk an hngal ti lo i a donghnak ah mi vialte thihnak cha cun minung pakhat thih a tha deuh lai, an ti i Nga Tai cu thlak an timh. Asinain a nu nih, “Kanmah sual ruangah kan tonmi a si tung lo, zeiruangahdah ka fanu theng cu kan thlak in kan thither lai,” a ti i a siang lo. A fanu cu fekte in aa tlaih I zapi he an i chut len, a donghnak ah an chuh khawh i Nga Tai cu a tah a ai bu in tilian ahcun an vun paih. Tilian chungah cun Nga Tai cu a vung pil zuahmah. A nu nih a tahbu le a hrambu in, “Ka fa dawt sian lo, Nga Tai aw… nang ngami ah vung i cang law,” tiah a cah ta, ti a si.
Nga Tai cu a nu bia bang ngami ah aa cang taktak. Cucaah ngami cu minung bantuk in hnuk a ngei I taw zong aa ngeih venak a si an ti. Nga Tai nu cu a lung a leng tuk. A fanu zun in a zaw zungzal, ti a si. A fanu zung cu a tuar i ei le din zungzuam lo le tuan zaang tlung lo in a um. Mi thil he fing le tlang kip a cult awn.
Aa chokvak lengmang i tlangsang kip hin khua za a cuan tawn. A umhar le a lunglen celh loah thiam tal ka bang lai a ti I thiam tial baannak dingah tlangsang le tlangdawh a kawl I a donghnak ah tlangdawh ngai pakhat a hmuh i cuka cun thiamtah aa thawk. Thantlang peng Khualhring tlang chungah tlangsang ngai pakhat a um i, cu tlang cu “Ngatai nu tlang” tiah atu tiang auh a si. Pupa chan ah cun Nga Tai nu thiamruak zong a rak um, an ti. Nga Tai nu tlang ah cung thiam a tak i Falam peng Ramthlo khualu Zinghmuh tlang ahkhin a thiam tlang a rak sih.
Nga Tai nih a nu thiam a tah le a lunglen kha a theih tikah minung in a hun i langh i a nu cu a hung veh tawh, ti a si. A nu sin a phanh tikah a taitang cu nga a si i a tai cungcu minung a si. Minung bantuk in minung sin ah um awk a that lo caah caansau um lo in ti chungah a kir than tawn. A nu a thih hnu zongah Nga Tai cu tlang ah a kai tawn i a nu um tawnnak kha lungleng le ngaihchia in a rak cult awn. Kha ti tlang i a kai kha minung nih an hmuh tawn i ngaknu dawh tuk a si fawn, a tai tang nga a si fawn tikah a hmumi kip an khuaruah a har i a min ah Ngatainu tiin an auh colh ti a si.
Leave a Reply