NLD Hi Kan Hrawh Lai I Hruaitu Pawl Dan Kan Tat Lai tiah U Thein Soe (UEC Chairman) Nih A Chim

Min Aung Hlaing hruaimi ralhrangbu nih vawlei dongh tiang rampi uk an duh zia a langh chin lengmang.

Kum 2020 thimnak ah Landslide bak in teinak a hmumi NLD cu kan hrawh lai i hruaitu vialte rampi leirawitu sinak in dan kan tat hna lai tiah SAC nih a thar in a khanhmi UEC Chairman U Thein Soe nih a chim.

A rauh hlanah 2020 thimnak i vote a dik lomi zohfelnak kan lim cang lai i timh ciammam tein vote dik loin a tuahtu NLD party cu kan hrawh lai i hruaitu pawl dan kan tat hna lai tiah May 21, Naypyidaw ah tuahmi ramkhel party hna le UEC tonnak ah U Thein Soe nih a chimmi a si.

“Party pakhat lawng nih cozah ser kho dingin timh ciammam tein an tuahmi a si” tiah U Thein Soe nih cun a chim.

Tutan UEC le ramkhel party pawl tonnak ah ramkhel party 60 an kai i hi party hna hi thimnak lioah teinak a hmu bal lomi deuh lawngte an si. UEC Chairman nih cun ramkhel party hna sinah NLD nih dik loin vote an tuahmi nan theih ahcun kan chim u tiah a ti hna.

Kum 2020 thimnak ah rampumpi huap in NLD nih 80% teinak a hmuh i cucu rallokap nih kan cohlang lo an ti caah nawlngeihnak an lakmi a si. Thimnak kong hi cu silhnalhnak an hman menmi a si. Nawlngeihnak lak than te ding hi an i timh pengmi a si.

SAC nih UEC Chairman ah an khanhmi U Thein Soe hi Myanmar thimnak kip ah a dik lo ningin vote a tuahtotu a si tiin min a thangmi a si. Thein Sein cozah a kai lai, 2010 thimnak lio zongah UEC chairman a rak tuan balmi a si.

The Chin Post