Nihnin Ah Ralhrang 63 An Thah Hna

YDF nih Kawl ralkap 10 thah, 15 hliamh Nihin November 7, zinglei ah Kyaw khua lei in a ra mi Kawl ralkap 100 cu bomb kan puahhnawh hna i 10 an thi, 15 an i hliam, tiah Yaw Defense Force-YDF nih an thanh.

Kyunhla peng ralhraang le PDF kar kahdohnak a chuak i ralhraang 25 hrawng a thi mi le hliam tuar an tuar Sagaing ramthen Kyunhla peng Ayechianthar khua ah November 6 zing suimilaam 9:00 hrawng ah hmunhma thianh ah a vaak mi ralhraang thazaang 200 hrawng le Kyunhla PDF kar kahdohnak a chuak tiah kan theih.

Kyunhla PDF nawlngeitu pakhat nih “Kaphnih kar kahdohnak voi hnih a chuak i ralhraang 25 hrawng an thi lai, kanmah lei in pakhat le khuami pakhat hliamtuar an um. Ayechianthar khua Nitlak lei cu ralhraang nih an khangh caah mizapi kilvengtu phu nih khuami cu kan chanhchuah hna” tiah a chim.

Ralhraang nih Ayechianthar khua cu hriamngan in an kah caah inn hnih a kaang. A voi khatnak kan i kahnak hi Innhla le Ayechianthar khua kar ah a si i ralhraang 20 hrawng a thi mi le hliamh mi an um tiah chim. Ayechianthar le Leiksintaung khua kar ah a voi hnihnak kahdohnak a chuak than i ralhraang 6 hrawng hliam tuar an um than tiah Kyunhla PDF nih an thanh.

Ralhraang nih khua chung ah hriamngan an kah caah khuami cu an zaam hna tiah tualchung mi pakhat nih a chim. Khua phungki sianginn i a taang mi nu hna cu an tulkvelh hna i an checkhlat hna. Khua phungki lutlai i phone le ralzaam hna phone an chuh dih hna tiah a chim. Credit: DVB

Mindat Peng ni hnih chung kahdohnak ah Council ralkap 28 an thi Chin Ramkulh thlanglei laitlang Mindat peng ah ni hnih chung mizapi ralkap CDF le bawi aa cuhmi Min Aung Hlaing ralkap hna karlak ah kahdohnak a chuak i MAH ralkap minung 28 an thi tiah kan theih. Min langhter duh lo pakhat nih, “Ni hnih chung pehtlai in kahdohnak a chuak.

Tutan kan kah hna i lamkam ah bawh in naih ngai in kan kah hna. A nikhatnak ah council ralkap pariat an thi. Nihin November 7 kahnak ah 20 an thi,” tiah thawng a theitu pakhat nih a chim. November 6 le 7 kahdohnak ah Mindat CDF lei in pakhat a nunnak a liam i minung pakhat hliam a tuar. Cun, council ralkap lei zong in minung tampi thi deengmang in hliam an tuar Cun, Council ralkap nih an kalnak i an hmuh Sia, Caw, Ar le vok zong an duh poh in an thah tiah kan theih.

Be the first to comment

Leave a Reply

Your email address will not be published.


*