Dec 5, tuzing suimilam 8 hrawngah Rangoon khuapi Kyih Min Daing peng chung i Pann Pyin Gyi lampi zulh in lam a zawhmi mizapi hna cu ralhrang mawṭaw pakhat nih rang taktak in a pah hna i minung 5 an thi, meithal hliamtuarmi 8 le tlaihkhih a tongmi 10 hrawng an si tiah lamzawhnak ah aa tel ve mi pakhat nih BBC ah a chim.
Lamzawhnak ah aa tel i hliam a tuarmi hna cu ralhrang nih an tlaih colh hna tiah theih a si. A thimi le hliamtuarmi hna kongah fiang tein chim khawh a si rih lo. Lam a zawmi mino hna tlaih dingin a ra mi ralhrang pakhat zong fak ngai in khonden a tong ve. Rang taktak in a rak tlimi mawṭaw cungin mino hna tlaih dingah,.
A zuang i mawṭaw ah aa thlai caah khonden a tonnak hi a si. A hmun ah a um ve mi mithmutu pakhat nih cun “Mino hna tlaih dingin mawṭaw cungin a zuang, asinain mawṭaw ah aa thlai caah a meithal zong a thalia. Fak ngai in aa khong ve” tiah a chim. Card; The Chin Post
Nihin ah SAC Ralhrang nih Yangon khuapi ah Sandah piahmi mino bu pawl cu Motor in an panh hna, Meithal in an kah chih hna caah a thi mi le hliamtuar an um len. Cu ahcun Sandah piahtu hna kong thawngpang a latu, hmanthla tu Myanmar Pressphoto Agency in Journalist minung pahnih zong faak ngai in hliam an tuar bu in an tlaih chap hna ti asi.
Hliamtuar buin an tlaih chap mi Journalist nute cu faaktuk in hliamtuar a si caah a nunnak caah thinpang a si ko, a nunnak caah 10% lawng ruahchannak a um tiah an chim.“Myanmar Pressphoto Agency Journalist nute hi faaktuk in hliam a tuar. Cu bu cun Police le Ralkap nih an tlaih i an kal pi.
A lu zong faaktuk in an hliam caah a nunnak caah thinphang dirhmun a si ko, a nun ding zumh a si lo ti tluk a si” tiah an chim. Cun a hawipa pakhat lila zong Ralkap le Police nih an tlaih i an kal pi ve ti asi. Hi Journalist pahnih hna hi Sandah piahnak ah thawngpang latu, hmanthla tu dirhmun in aa tel ve mi an si.
Leave a Reply