Kawl Ralkap nih Taal khua inn 7 an khangh, Falam Peng ah inn 30 tluk an khangh cang. Nihin October 25 zinglei ah Falam Peng Taal khua inn 7 Kawl ralkap nih an khangh i Falam peng ah inn 30 an khangh cang tiah kan theih. “Hi Kawl ralkap pawl hi kan khua Thlanrawn lei ah an ra lio.
Kan khua inn a taang mi an khanghchap sual lai tiin kan thin kan i domh. Taal le Thlanrawn caah thla kan campiak ulaw,” tiah Calvary Thang nih a facebook cahmai ah a tial. Kawl ralkap nih Falam Peng ah Rialti khua inn 10, Thlanrawn ah inn 13 le Taal ah inn 7 tiin an khangh cang, tiah kan theih.
ASEAN palai cu Ralhrangbu nih ralhrangbu tiah a thanhmi NUG he pehtlaihnak le biaruahnak ngeih lo dingin ralrinnak an pek tiah theih a si. Hi kong hi amah ASEAN palai nih a chim i Japan thawngthanhnak pakhat NHK nih a tialmi a si. ASEAN palai Erywan Yusof nih cun ASEAN biachahnak phun 5 kha a tak in tuanchuah dingah ralhrangbu he biaruahnak an ngei.
Ralhrangbu nih Oct 23 ah ASEAN biachahnak phun 5 cu kan zulh lai tiah cathanh an chuah cang. ASEAN palai nih cathanh a chuahmi ah State Counselor Daw Aung San Suh Kyi le President U Win Myint telh in mi biapi hna he tonbiaruahnak ngeih a herhnak kong kha biapi ngai in a langhter. Asinain atu tiangah cun ralhrangbu nih Suh Kyi le U Win Myint cu tazacuai in biaceih liomi an si caah ASEAN palah he tonnak nawl an pe rih lo tiah theih a si.
A rauh hlan (Oct 26-28) ah ASEAN Summit cu tuah a si cang lai. Hi meeting ah ralhrangbu hotu cu sawm lo dingin ASEAN ramleng vuanci hna nih biakhiahnak an tuah. Cule cangka in ralhrangbu nih thongtla tam nawn an thlah hna. Cu pinah ASEAN meeting ah saw lo ding timi cu ASEAN zulhphung he aa kalh,
ASEAN zulhphung ningin meeting ah tel khawhnak covo tlingtein kan ngei tiah Oct 22 ah cathanh an chuah. Oct 23, nizan ah cun ASEAN biachahmi phun 5 cu kan zulh ko lai tiah cathanh an chuah than. Tutan ASEAN Summit ah NUG nih kanmah kan kai lai tiah tuanvo ngeitu hna sinah thawng an thanh cang nain atu tiang zeihmanh lehnak a um rih lo.
ASEAN hruaitu hna nih an biakhiah cangmi let in ralhrangbu hotu maw an sawm lai? Asiloah mipi duhnak zulh in NUG dah an sawm lai? Asiloah an pahnih aiawhtu sawm loin ramkhel he pehtlaihnak a ngei lomi hruaitu pakhat khat maw an sawm lai? Asiloah Myanmar aiawhtu sawm lo lawlaw in dah an um lai? Hi biahalnak hna hi a ni le caan taktak a phak hlan cu fiangtein leh awk a tha lo. Ref: BBC
Leave a Reply