Ralhrang Sakhan Pakhat An Lak i Ralhrang 20 Hrawng An Thi

Sagaing ramthen, ChawngOo peng ChawngOo-Sinphyushin lampi ah ralhrang phu hna motor cu mi zapi vengtu phu li fonh nih bomb he an doh hna caah ralhrang lei in minung 10 nak tlawmlo an thi i ralhrang phu motor a nganmi pakhat cu a rawk. Ralhrang motor cu a rawh caah seh in an dawh than tiah,.

ChawngOo peng mi zapi vengtu ralkap phu nih cathanh an chuah. Ralhrang phu le mi zapi vengtu ralkap phu li fonh kar kahdohnak cu ChawngOo -PDF, 27 Revolution Forces, Myaung Special People’s Defense Force MSPDF le T.G.R Myaung phu li fonh nih an doh hna tiah theih a si. Khit Thit Media

Nov 22 zinglei ah khan Kayin ramkulh KNU Brigade-5 hmunhma chungah a ummi ralhrang Me Wine (sakhan cu KNU ralkap KNLA nih an lak tiah theih a si. Sakhan lak kahdohnak ah kap in a thimi an tam Khet Thit Media nih a tial.  Asinain hi kong hi KNU Brigade-5 nih fehternak an chim/chuah rih lo.

KNU thawngthanhnak Thoo Lei nih cun Me Wine sakhan lak kahdohnak cu zinglei 8:00am in zalei 2:00pm tiang a rau. Kahdohnak hmunhma cu KNLA nih zanlei 6:00pm tiang zohfelnak an tuah. KNLA ralkap 10 an nunnak a liam i 7 nih hliam an tuar tiah a tial. Ralhrang lei a thimi an tam ve nain a zat langhter a si rih lo.

Min Chan Ah PDF Phu 4 Fonh Nih Ralhrang An Kah Hna, Ralhrang 8 An Thi: Mandalay ramthen Min Chan peng, Gun Set khua sianginn kulh chungah hmunhma a khuarmi ralhrang hna cu Nov 22, zan 10:40pm ah PDF phu 4 fonh nih an kah hna i ralhrang 8 an thi. A thimi chungah ralbawi pakhat zong aa tel tiah tualchung thawngthanhnak nih an langhter.

PDF phu 4 hna cu 27Revolution Forces, Zero Guerrila Force (Min Chan), Nathogyi Regional PDF le Natogyi People Defence Forces hna an si. Ralkap thazaang 20 nih an hriamhme le RPG7 in an kah hna. Sianginn kulh chungah a ummi ralhrang hna nih cun an kap kho ve hna lo caah ralbawi pakhat telh in ralhrang 8 an nunnak a liam hi a si.

Ralhrang 2 zong fak ngai in hliam an tuar. Cun Nov 23, tuzing 6:50am hrawngah Kaya ramkulh Demoso peng Daw Po Si phungki sianginn ah a ummi ralhrang le KNDF B-09 cu an i kap i ralhrang 2 an thi tiah KNDF nih an thanh.